ABANCA pecha en Arousa o seu plan informativo e de impulso ao sector pesqueiro
- A entidade financeira completa cun dobre acto en Vilagarcía e Boiro un ciclo de encontros informativos con preto de 400 profesionais do mundo do mar
- O banco, a través da súa división ABANCA Mar, presenta a súa oferta financeira e dá a coñecer o programa de axudas do Fondo Europeo Marítimo e de Pesca
Encontro en Boiro con profesionais do GALP Ría de Arousa.
Encontro en Vilagarcía con profesionais do GALP Ría de Arousa.
Encontro en Boiro con profesionais do GALP Ría de Arousa.
ABANCA pechou cun dobre acto en Vilagarcía e Boiro o seu plan de encontros co sector pesqueiro de Galicia. Unha reunión de traballo por duplicado que permitiu congregar a preto dun centenar de profesionais dos Grupos de Acción Local do sector pesqueiro (GALP) da ría de Arousa.
Estas derradeiras presentacións súmanse a outras que a entidade financeira organizou nas últimas semanas. En total, seis reunións para coñecer de primeira man as necesidades do colectivo e dar resposta ás súas demandas máis perentorias. A iniciativa informativa e comercial chegou ata 400 integrantes dos colectivos GALP Ría de Vigo, Ría de Pontevedra, Ría de Arousa, SEO Fisterra/Ría de Muros-Noia e Costa da Morte. Unhas sesións reducidas que reforzan o compromiso e a especialización que a entidade impulsou co lanzamento da súa división ABANCA Mar o pasado mes de outubro.
Este plan de encontros informativos co sector, en colaboración cos distintos GALP, busca no só amosar a oferta financeira personalizada de ABANCA para o sector, senón tamén estimular o desenvolvemento da pesca, marisqueo e acuicultura galegos. Durante as sesións, os representantes dos GALP presentan o programa de axudas do Fondo Europeo Marítimo e da Pesca (FEMP) 2014-2020, que xestiona a Xunta en colaboración con estes grupos sectoriais.
ABANCA Mar, ao servizo do sector
Esta alianza de ABANCA cos GALP é a continuación doutras iniciativas postas en marcha no último trimestre do pasado ano con este sector. A entidade financeira impulsou reunións específicas con preto de 60 confrarías da comunidade e renovou os convenios financeiros que mantiña en vigor. A estas iniciativas de apoio ao sector primario súmase un crecente catálogo de produtos, ademais da proximidade e experiencia dun equipo de profesionais altamente cualificados.