ABANCA permite ás empresas agrupar os seguros e pagalos mes a mes
- O novo produto gratuíto, pioneiro no mercado, facilita ás pemes e empresas a xestión integrada de todos os seus seguros e o pago nun único recibo
- Esta innovadora solución, ata o de agora dispoñible só para particulares, permite fraccionar gratis o pago das primas en cotas mensuais
- Os clientes poderán aforrar ata un 7% no seu recibo e financiar sen custo ata dous pagos ao ano
Oficina principal de ABANCA na Coruña.
Descarga en alta resolución Serás redirixido a outro sitio web e abrirase nunha nova ventá
ABANCA estendeu ás pemes e empresas a súa innovadora tarifa plana de seguros, que permite, sen custo algún, agrupar todas as pólizas nun único produto e repartir o custo da prima anual en cotas mensuais.
Coa tarifa plana de seguros para empresas de ABANCA, a primeira do mercado con estas características dirixida a persoas xurídicas, o cliente terá nun único recibo as pólizas contratadas coa entidade e beneficiarase do fraccionamento gratuíto do importe da prima anual dos seus seguros, pagando o mesmo cada mes. Dado que as primas abónanse integramente de forma anticipada, a empresa consegue o mellor prezo por forma de pago e é ABANCA quen se encarga de financiar este custo en 12 mensualidades, sen xuros nin comisións. Ademais, no caso de que o cliente o necesite, poderá aprazar, tamén de forma gratuíta, ata dúas cotas mensuais ao ano.
O primeiro seguro de ABANCA para empresas que se pode contratar -e renovar- con esta cota fixa mensual é a seguro Vida Pemes. Nos próximos meses poderanse domiciliar con esta innovadora fórmula de pago os novos seguros propios para o segmento de persoas xurídicas que o banco ten previsto lanzar ao mercado. En canto se incorporen máis modalidades con tarifa plana, as empresas e pemes poderán acceder tamén ao sistema de bonificacións deste produto e aforrar ata un 7% do importe do recibo mensual, en función dos seguros que domicilien. Do mesmo xeito que na tarifa plana de seguros para particulares, a porcentaxe mínima de bonificación, con tres ramos de seguros agrupados, será do 3%.
Esta solución financeira permitirá ao cliente xestionar os seus seguros de forma sinxela e integrada, coma se fose un único produto. Recibirá nun só extracto información periódica unificada con detalle da tarifa plana e dos seguros adheridos e todas as súas coberturas, e terá á súa disposición atención personalizada a través dun teléfono único gratuíto.
Unha solución innovadora
A extensión da tarifa plana de seguros ás persoas xurídicas é un paso máis na estratexia da entidade de potenciar o negocio asegurador e mellorar a experiencia dos seus clientes con produtos vantaxosos, sinxelos e innovadores.
ABANCA lanzou en 2016 a primeira tarifa plana de seguros para particulares en España, un produto diferencial que se converteu nun referente no mercado. Esta fórmula nova tivo unha excelente acollida entre as familias, e neste momento, sete de cada dez pólizas de seguros comercializadas polo banco xa se domicilian con tarifa plana. Máis de 195.000 clientes benefícianse das vantaxes desta solución financeira gratuíta e de pago agrupado, mentres que as pólizas adheridas superan as 250.000. Desde 2019, este produto incorpora outra característica única no sector: a posibilidade de adherir, ademais de seguros, achegas extraordinarias a plans de pensións individuais da entidade e financialas gratuitamente fraccionando o pago a través da súa cota fixa mensual.