ABANCA pon en marcha unha liña de financiamento multidestino para o sector agrogandeiro
- A entidade habilita unha liña de crédito recorrente que permite anticipar as axudas da PAC, facer fronte aos gastos de campaña e financiar as primas de seguros agrarios nun só contrato
- O cliente accede ao financiamento con maior axilidade, menos trámites e os custos de formalización redúcense significativamente
Stand de ABANCA na última edición da Feira Internacional ABANCA Semana Verde de Galicia, evento referente no sector.
ABANCA lanza un produto de financiamento multidestino, pensado para adaptarse ás necesidades de financiamento dos clientes do sector agrícola e gandeiro. A nova “Liña de Financiamento Agro Multidestino” permite aos profesionais deste segmento unificar nun só contrato o financiamento máis habitual de circulante co conseguinte aforro de custos.
De forma pioneira no sector, o banco ofrece unha resposta única a tres das necesidades máis habituais deste colectivo: o anticipo das axudas PAC, o acceso a fondos para facer fronte aos gastos das campañas agrícolas e gandeiras e o financiamento das primas de seguros agrarios contratados en ABANCA. Agrupando estes tres destinos, o cliente dispón dos fondos en función das necesidades específicas que se produzan ao longo do ano.
Na práctica, esta solución de crédito formalízase unha soa vez por un importe máximo que coincida coa suma dos tres conceptos e cun mínimo de 3.000 euros. Cada 12 meses renóvase na propia oficina, algo que permite reducir significativamente os custos de intervención asociados habitualmente ás operacións de financiamento. A retirada de fondos realízase cando o cliente o solicita, tamén na propia sucursal de xeito case inmediato, xa que se tramita mediante un expediente simplificado.
Tanto na contratación do produto como nas sucesivas renovacións, o cliente poderá escoller entre as dúas modalidades dispoñibles para acceder aos fondos: con xuros e sen comisións ou con comisións e sen xuros. No caso de non realizar disposicións na “Liña de Financiamento Agro Multidestino”, non se aplicará ningún tipo de gasto. O capital amortizado liberarase de novo para novas provisións.
Máis preto das necesidades do sector
A entidade financeira ofrece unha resposta agrupada ao mundo agrícola e gandeiro a través da súa unidade especializada ABANCA Agro, creada en 2015. Con máis de 65.000 clientes e un volume de negocio de máis de 5.100 millóns, a súa proposta pioneira apóiase na extensa rede comercial da entidade financeira, con xestores especializados e un catálogo propio de produtos e servizos en constante evolución, que permiten no seu conxunto a creación de solucións a medida.
Nos últimos anos, o banco ten activado respostas aos retos aos que se enfronta un sector clave na economía produtiva. ABANCA protagonizou o impulso de tendencias como a aposta pola sostibilidade mediante unha xestión máis eficiente dos recursos hídricos ou enerxéticos, a dixitalización, a adaptación á nova PAC ou a mellora dos procesos produtivos do mundo agrario. Ademais, foi un actor fundamental para apoiar o sector para aproveitar as posibilidades que ofrecen os fondos Next Generation da Unión Europea a través dos diferentes PERTE, especialmente o agroalimentario.
A entidade financeira tamén foi un socio fundamental do sector e impulsou algúns dos eventos sectoriais máis importantes que se celebran como a Feira Internacional ABANCA Semana Verde de Galicia, a Feria Internacional de Maquinaria Agrícola (FIMA), Expobiomasa de Valladolid ou Agroexpo en Badaxoz. Ademais, ten asinados numerosos convenios de colaboración financeira cos principais axentes do sector.