ABANCA presenta a unidade de Banca Privada Entidades Non Lucrativas e Impacto e incorpora a Armando Fandos como team leader
- Coa creación deste novo departamento, o banco proporciona servizos de xestión de patrimonio a institucións relixiosas, fundacións, asociacións e outras entidades sen ánimo de lucro
Armando Fandos, team leader de Banca Privada Entidades Non lucrativas e Impacto de ABANCA
Descarga en alta resolución Serás redirixido a outro sitio web e abrirase nunha nova ventá
Armando Fandos incorporouse recentemente a ABANCA como team leader de Banca Privada Entidades Non lucrativas e Impacto, área de nova creación coa que o banco proporcionará servizos de xestión de patrimonio a institucións relixiosas, fundacións, asociacións e outras entidades sen ánimo de lucro.
Licenciado en Dereito pola Universidade Alfonso X (UAX), Armando Fandos conta co certificado en Wealth Management polo Chartered Institute for Securities & Investment (CISI), o posgrao en Asesoramento Financeiro pola Universitat Pompeu Fabra (UPF), e o certificado como ESG Analyst (CESGA) pola Federación Europea de Sociedades de Analistas Financeiros (EFFAS).
O novo responsable de Banca Privada de Entidades Non Lucrativas e Impacto de ABANCA acumula 16 anos de experiencia no sector financeiro, en unidades de banca privada de grandes entidades e no mercado family office. Na súa traxectoria impulsou, entre outros, diferentes proxectos relacionados co investimento sostible e co segmento de institucións relixiosas e entidades non lucrativas.
Especialización e maior posicionamento nacional
ABANCA creou a área de Entidades Non Lucrativas e Impacto no marco do seu plan de impulso do negocio de banca privada. “Somos plenamente conscientes tanto da importancia deste colectivo, que nos últimos anos avanzou moito na profesionalización das súas capacidades de xestión, como do tremendo impacto da súa actividade na nosa sociedade, polo que cremos necesario desenvolver unha proposta de valor especializada que adapte as fortalezas das nosas solucións ás súas características e necesidades específicas”, explica Javier Rivero, director de Banca Privada. O plan da entidade tamén persegue aumentar o seu posicionamento no mercado nacional, establecendo o núcleo operativo desta unidade en Madrid.
Como parte desta estratexia, ABANCA Privada operará tamén nos ámbitos do investimento ESG/Impacto e a filantropía, cada vez máis protagonistas nos servizos de banca privada. Este enfoque está aliñado co compromiso corporativo de ABANCA e abre novas oportunidades de colaboración coa súa Obra Social, Afundación.