ABANCA presenta no Museo de León a exposición 'Nuevas lecturas. Diálogos en el tiempo y en el lugar'

18-09-2018

ABANCA abre ao público mañá mércores 19 de setembro no Museo de León a exposición Colección ABANCA. Nuevas lecturas. Diálogos en el tiempo y en el lugar, que presenta á sociedade leonesa unha nova selección de obras dos fondos artísticos do banco, a colección de carácter privado máis relevante de Galicia e unha das máis importantes de España.

O terceiro proxecto expositivo do banco na capital leonesa vai máis aló dunha tradicional narración da historia da arte e expón un orixinal diálogo entre distintas creacións dalgúns dos artistas máis relevantes da arte española e internacional con representación na Colección ABANCASerás redirixido a outro sitio web. Entre os 29 autores elixidos atópanse nomes con amplo recoñecemento como Julião Sarmento, Soledad Sevilla, Juan Muñoz, Paul Klee ou Joaquín Sorolla.

Con esta mostra a entidade financeira pecha o primeiro ciclo de exposicións que organizou en León no marco do acordo subscrito en 2016 coa Junta de Castilla y León e o Ayuntamiento leonés, tras a excelente acollida que brindou o público ás dúas primeiras propostas,Bajo el signo de Picasso (2016) e La mirada contemporánea (2017), que presentaron na cidade os dous grandes bloques nos que se organiza a Colección ABANCA: Picasso e as vangardas internacionais e a arte española e internacional da segunda metade do século XX.

Colección ABANCA. Nuevas lecturas. Diálogos en el tiempo y en el lugar pon o broche final a esta serie de exposicións que se puideron contemplar no Museo de LeónSerás redirixido a outro sitio web e faino cunha lectura contemporánea da colección do banco. Os encontros que se expoñen entre as 36 obras seleccionadas de 29 artistas inciden sobre diversas temáticas que teñen unha presenza relevante na pinacoteca, como son a arte e o xogo, a arte como espectáculo, memoria e soño, a mirada íntima, a luz e a paisaxe.

A introspección é un dos conceptos que subxace en varias das obras elixidas e unha das relacións que se establecen na mostra a través de creacións como a escultura Laughting chinese man with mirror (1997) de Juan Muñoz, que nos mostra a un home que ri do seu propio reflexo porque se volveu incapaz de recoñecerse a si mesmo e serve ao autor para expresar a súa crítica coa sociedade e a incomunicación actual. Esta idea de reflexión interior intúese tamén na pintura Después del baño (1904), de Joaquín Sorolla, que forma parte da relación de obras expostas no Museo de León.

Outro elemento común en varias creacións presentes na mostra é o protagonismo que adquiren as xanelas en obras tan dispares e afastadas no tempo como Dolce far niente (1885), de Darío de Regoyos, e Santiago: ventana con plantas (2000), de Elisa Sighicelli.

Os diferentes diálogos que se propoñen ofrécenlle ao espectador a posibilidade de crear as súas propias lecturas e un novo modo de achegarse á arte hoxe a partir de novas coordenadas para interpretalo. A exposición estará aberta ao público nas instalacións do Museo de León até o próximo 6 de xaneiro, con entrada gratuíta, no horario habitual do centro: até o 30 de setembro, de martes a sábado de 10.00 a 14.00 horas e de 17.00 a 20.00 horas, e os domingos e festivos de 10.00 a 14.00 horas. A partir do 1 de outubro, de martes a sábado de 10.00 a 14.00 e de 16.00 a 19.00 horas, e os domingos e festivos de 10.00 a 14.00 horas. O banco e o servizo didáctico do museo organizarán un programa de visitas guiadas e outras actividades didácticas dirixidas a diferentes colectivos.