ABANCA presentará este mes en León a cuarta exposición con fondos da súa Colección de Arte
- A mostra titularase ‘Pintura escrita. Arte e Literatura. Colección ABANCA’
- O novo proxecto achegará ao público leonés unha trintena de obras da Colección ABANCA
- A exposición abrirase ao público no Museo de León o próximo 21 de marzo
Fragmento da obra de Urbano Lugrís El anticuario del puerto (1946), que forma parte da Colección ABANCA e poderá contemplarse na exposición.
ABANCA ultima os preparativos da que será a súa cuarta exposición en León. A proposta preséntase co título ‘Pintura escrita. Arte e Literatura. Colección ABANCA’ e poderá contemplarse no Museo de León desde o 21 de marzo ata o 30 de xuño.
Este novo proxecto, que conta coa colaboración da Junta de Castilla y León, amplía o discurso narrativo das tres primeiras exposicións organizadas polo banco na cidade entre os anos 2016 e 2019, e ofrecerá ao público leonés a oportunidade de coñecer unha trintena de obras da Colección ABANCA.
Para esta exposición seleccionáronse creacións de artistas con gran recoñecemento nacional e internacional. Entre eles, André Lhote. Juliâo Sarmento, Luis Seoane, José Caballero ou Eugenio Granell. As obras escollidas compleméntanse cunha serie de referencias literarias entre as que non falta unha representación dos grandes autores das letras leonesas, como Julio Llamazares, Antonio Gamoneda, José María Merino, Luis Mateo Díez ou Juan Pedro Aparicio.
Como indica o propio título da mostra, arte e literatura comparten protagonismo neste novo proxecto expositivo que se nutre dos amplos fondos que configuran a Colección de Arte ABANCA. Máis de 1.350 obras de 200 artistas de máximo nivel, que ofrecen múltiples posibilidades para deseñar exhibicións de grande interese e temática variada, sempre coa arte moderna e contemporánea como eixo vertebrador.