ABANCA, primeiro banco español en implantar a tecnoloxía de chaves de acceso na banca móbil para reforzar a seguridade dos seus clientes

  • O novo servizo Chave ABANCA verifica de forma sinxela e segura a identidade dos clientes e eliminará o uso das claves persoais nas transaccións
  • O innovador sistema Passkey utiliza o método de desbloqueo do dispositivo do cliente para validar envíos de diñeiro, pagos ou outras operacións importantes

Descarga en alta resolución Serás redirixido a outro sitio web e abrirase nunha nova ventá

ABANCA acaba de lanzar Chave ABANCA, un innovador servizo dixital de verificación de identidade baseado na tecnoloxía de chaves de acceso (tamén coñecida como Passkey, en inglés), que permite reforzar a seguridade das operacións a distancia e protexer a información confidencial do cliente. ABANCA é a primeira entidade financeira española en implementar esta avanzada tecnoloxía criptográfica na súa aplicación de banca móbil.

Chave ABANCA achega ao cliente un factor adicional de seguridade nas súas operacións desde a súa banca móbil e axúdalle a protexer as súas credenciais fronte a intentos de suplantación como phishing e outras técnicas fraudulentas. Grazas a este sistema, o cliente poderá verificar a súa identidade a través dos seus datos biométricos (cara ou pegada) ou o PIN do seu dispositivo móbil, sen necesidade de comprometer as súas claves persoais nin de introducir contrasinais dun só uso para validar envíos de diñeiro ou pagos.

Unha vez que o cliente configure Chave ABANCA desde a app, quedará activa no seu móbil e serviralle para confirmar a súa identidade de forma sinxela, áxil e segura. A chave de acceso solicitaralle o método de desbloqueo do dispositivo (cara, pegada dactilar ou PIN) para autenticar as súas credenciais no momento de realizar operacións importantes como transferencias, envío de diñeiro a través de Bizum ou creación de tarxetas virtuais, entre outras. Con este sistema, unicamente o cliente terá acceso á súa Chave ABANCA, xa que permanecerá exclusivamente no seu dispositivo móbil e nunca se compartirá co banco.

Compromiso coa innovación e a seguridade

Para José Manuel Valiño, director xeral de IT, Procesos e Operacións de ABANCA, “Chave ABANCA proporciona aos clientes o maior nivel de protección nas súas operacións a distancia mantendo a mesma experiencia de usuario, e supón un paso máis no noso compromiso fronte ao ciberfraude”. Subliña que “incorporar a chave de acceso de maneira pioneira para o sector supuxo un importante desafío de deseño e tecnolóxico para os nosos equipos, e cremos que pronto será o estándar do mercado para blindar a verificación de identidade dos clientes de forma áxil e sinxela”.

Chave ABANCA xa está dispoñible para máis de 5.500 clientes de banca móbil do banco, e estenderase de forma gradual a todos os usuarios da app. Unha vez consolidado este innovador servizo na súa banca móbil, ABANCA ten previsto implementalo noutras plataformas do banco como na banca electrónica.