ABANCA Privada lanza un fondo de investimento private equity en alianza con BlackRock

14-12-2020

ABANCA ampliou a súa carteira de produtos de investimento co lanzamento para os seus clientes de banca privada dun fondo de investimento en empresas non cotizadas. Para reforzar a súa oferta en dito segmento de clientes, ABANCA elixiu como partner a BlackRock, a maior xestora de fondos do mundo, que xestiona activos por valor de 6,5 billóns de euros e ten presenza en 100 países. O lanzamento deste produto forma parte do plan de desenvolvemento do negocio de banca privada iniciado en 2019 por ABANCA.

ABANCA dirixe este produto, BlackRock Private Equity Opportunities ELTIF, a investidores experimentados, dispostos a asumir un maior risco e cun horizonte de investimento a longo prazo. O fondo ten previsto investir en empresas de todos os sectores na Unión Europea, Estados Unidos, Canadá, China e Corea do Sur, tanto en compañías consolidadas como en empresas xóvenes, sempre non cotizadas.

O produto, regulado en Luxemburgo, xorde da necesidade de ofrecer aos clientes novas opcións de investimento ante as dificultades derivadas da ralentización do crecemento, os baixos tipos de interés e a volatilidade dos mercados cotizados e bonos. Os fondos de private equity abren novas opcións de rendibilidade ao permitir o investimento en empresas non cotizadas que desenvolvan proxectos de consolidación ou crecemento.

Vantaxes para o investidor

Este tipo de investimento pode ofrecer ao investidor experimentado varias vantaxes en relación con outras opcións. Por unha banda, ao longo dos últimos vinte anos o comportamento do private equity está sendo mellor que o dos investimentos cotizados. Ademais, o seu rendemento ten menos correlación cos índices tradicionais de renda variable, renda fixa e outro tipo de produtos. Por último, permite ampliar as oportunidades de investimento en sectores en crecemento e proxectos empresariais emerxentes.

Todo isto confire a este tipo de produtos un valor especial como ferramenta de diversificación de carteiras. Adicionalmente, o cliente conta coa protección contemplada na normativa sobre fondos de investimento a longo prazo europeos (ELTIF).

ABANCA Privada

ABANCA Privada xestiona un patrimonio de 5.000 millóns de euros, conta cun equipo de máis de 50 banqueiros en España e Portugal, e 28 oficinas especializadas, 16 en España e 12 en Portugal. Tamén conta con presenza en EE.UU e Suiza.