ABANCA recibe un premio á “brillantez na innovación” por un proxecto de intelixencia artificial
- O premio, ao que optaban máis de 150 empresas a nivel mundial, recoñece o uso de distintos modelos de intelixencia artificial para axilizar a admisión de solicitudes de financiamento
Descarga en alta resolución Serás redirixido a outro sitio web e abrirase nunha nova ventá
ABANCA acaba de recibir o premio na categoría “Innovation Brillance” dos prestixiosos SS&C Blue Prism Customer Excellence Awards. Este novo recoñecemento chega grazas á destacada contribución da entidade financeira no campo da automatización e, especificamente, ao seu innovador proceso robotizado de financiamento ao consumo en ABANCA Servicios Financieros (ASF).
Segundo a compañía internacional SS&C Blue Prism, o proxecto de ABANCA demostrou ser altamente efectivo na automatización da admisión de solicitudes de financiamento desde os puntos de venda, reducindo drasticamente o tempo dedicado a tarefas manuais, mellorando os tempos de resposta do servizo de atención ao cliente e xerando significativas eficiencias.
O xurado eloxiou a capacidade de ABANCA para xestionar centos de miles de solicitudes de clientes utilizando esta combinación innovadora de tecnoloxías. E é que, desde que a entidade financeira ha implantado esta mellora, o robot tramitou máis de 18.500 solicitudes. "A introdución da intelixencia artificial permítenos dar un mellor servizo aos nosos clientes, máis áxil e homoxéneo, e ademais facilítanos dedicar o labor dos equipos a tarefas onde se achega máis valor”, sinala o director de ABANCA Servicios Financieros, Jesús Suárez López.
A transformación e dixitalización dos procesos constitúen eixes estratéxicos de ABANCA. Por iso a entidade creou un equipo de traballo específico cuxo obxectivo é a aplicación destas tecnoloxías innovadoras para reducir os tempos de resposta, aumentar a calidade e a eficiencia, e diminuír o risco operativo dos procesos máis críticos. Estas melloras iranse implantando progresivamente ao longo dos próximos meses.
"Fomos capaces de constituír un equipo dinámico, multidisciplinar e vangardista, que nos permitiu ser pioneiros na implantación de solucións que combinan os nosos modelos de intelixencia artificial, a IA xenerativa e a plataforma de robotización, para así resolver problemas complexos dunha maneira que era inimaxinable hai apenas dous anos", engade o director de Data, Analytics e Rtech de ABANCA, Jorge García Romarís.
Este recoñecemento resalta o compromiso de ABANCA coa innovación e a mellora continua dos seus procesos para ofrecer un servizo excepcional aos seus clientes. Ademais, sitúa ao banco á vangarda na aplicación de tecnoloxías emerxentes no sector financeiro.
SS&C Technologies
SS&C é un provedor global de servizos e software para as industrias de servizos financeiros e atención médica. Fundada en 1986, ten a súa sede en Windsor (Connecticut) e conta con oficinas en todo o mundo. Ao redor de 20.000 organizacións de servizos financeiros e atención médica, desde as empresas máis grandes do mundo ata pemes, confían en SS&C para obter experiencia, escala e tecnoloxía.