ABANCA reforza a súa Tarifa Plana de Seguros co financiamento gratuíto de achegas extraordinarias a plans de pensións

  • A iniciativa, única no mercado, ten por obxectivo favorecer o aforro dos particulares con vistas á xubilación aproveitando as vantaxes fiscais dos plans de pensions
  • O novo beneficio súmase aos xa coñecidos da Tarifa Plana: pago nun único recibo mensual con bonificación por ramos contratados e información integrada, clara e sinxela

Descarga en alta resolución Serás redirixido a outro sitio web e abrirase nunha nova ventá

A Tarifa Plana de Seguros, produto estrela de ABANCA no segmento asegurador, incorporou unha nova característica deseñada para favorecer o aforro dos clientes particulares con vistas á súa xubilación. Grazas a ela os clientes da entidade poderán realizar unha achega extraordinaria ao seu plan de pensións individual de ABANCA e financiala gratuitamente, fraccionando o seu pago a través da súa cota da Tarifa Plana, en 12 meses e sen intereses.

Na práctica isto permite que o cliente poida anticipar sen custo unha achega ao seu plan de pensións individual de ABANCA, aproveitando as vantaxes fiscais deste tipo de produtos, e realizar posteriormente e en mensualidades o desembolso da cantidade achegada. Ao xestionarse a través da Tarifa Plana, o proceso realízase de forma sinxela e áxil para o cliente.

“Esta iniciativa ten por obxectivo ampliar as vantaxes que ofrecemos aos nosos clientes a través da Tarifa Plana de Seguros, incidindo sobre unha cuestión, o aforro para a xubilación, de gran importancia para o seu benestar económico futuro”, explica Álvaro García Diéguez, director xeral de ABANCA Seguros.

Outras vantaxes da Tarifa Plana

Trátase dunha vantaxe única no mercado e exclusiva para os clientes de ABANCA que dispoñan da Tarifa Plana de Seguros. Con ela o banco complementa os beneficios xa coñecidos deste produto: pago dos seguros contratados nun único recibo mensual, bonificación na cota mensual de até o 7% en función do número de ramos contratados, e información integrada de todos os seguros incluídos nun extracto claro e sinxelo. Máis de 125.000 clientes de ABANCA son titulares da Tarifa Plana de Seguros.

Coa incorporación desta nova característica, ABANCA segue lanzando ao mercado asegurador produtos e servizos innovadores. Nos últimos meses o banco lanzou a gama de seguros ON-OFF e presentou ao seu novo socio industrial no ramo de seguros xerais, Crédit Agricole Assurances.

A nova posibilidade que agora se presenta súmase ao programa Xúbilo, creado por ABANCA para axudar aos seus clientes a prever a súa xubilación e ofrecerlles asesoramento na planificación do aforro.