ABANCA remata a integración de Banco Caixa Geral cun acordo que garante o emprego sen despedimentos forzosos
- ABANCA renuncia á vía do despedimento colectivo para resolver o excedente de persoal derivado da integración de Banco Caixa Geral
- O acordo, no que priman a mobilidade xeográfica e as baixas, acadouse co 82% da representación do persoal
- A entidade aposta por reforzar Galicia, o emprego e a calidade do servizo aos seus clientes
ABANCA remata a integración de Banco Caixa Geral cun acordo que garante o emprego sen despedimentos forzosos
ABANCA finalizou esta mañá o período de consultas cun acordo cos sindicatos CCOO, UGT e SIB-fine, centrais que representan un 82% do persoal. Os principais obxectivos da negociación foron harmonizar as condicións laborais de ambos cadros de persoal e resolver o excedente de profesionais derivado da integración de Banco Caixa Geral. Puxéronse en marcha fórmulas alternativas ao despedimento colectivo, como mobilidade xeográfica, prexubilacións e baixas incentivadas.
Renuncia a despedimentos colectivos
A renuncia de ABANCA á vía dun expediente de regulación de emprego e a súa substitución pola voluntariedade foi o eixo principal desta negociación, aberta coa¬ representación sindical do persoal o pasado 26 de febreiro no marco do proxecto de integración de Banco Caixa Geral.
Na negociación primou a aposta de ABANCA por Galicia e polo emprego. Para reforzar a presenza de ABANCA en Galicia pactáronse condicións de mobilidade xeográfica para os servizos centrais de Banco Caixa Geral en Madrid e, como medida alternativa nos casos nos que polas circunstancias persoais tal traslado non poida darse, as saídas voluntarias nos termos pactados. Para apostar polo emprego, traballouse nun plan de prexubilacións de forma que non se xere desemprego nas zonas que rexistran excedentes: servizos centrais de Madrid e provincias onde se produza reordenación de oficinas por proximidade.
Outro dos puntos fundamentais da negociación era facer compatible a calidade de servicio aos clientes coa mellora nas condicións laborais do persoal, en termos de flexibilidade horaria, que permita unha adecuada conciliación de vida persoal e familiar.
María Camino, directora xeral de Capital Humano agradeceu a responsabilidade dos representantes do persoal e mostrou a súa satisfacción por un acordo que “reforza a seguridade do emprego en ABANCA e nos permite reforzar a nosa posición de liderado en Galicia e o noso compromiso coas familias e empresas”.