ABANCA renova o seu compromiso coas confrarías da Mariña e aborda os desafíos do sector
- A entidade financeira e os principais pósitos da provincia trazan novas liñas de colaboración en materia financeira para avanzar nos retos do mundo do mar
- O banco aproveita un dos eventos máis relevantes do sector, a feira Expomar que se celebra estes días en Burela, para dinamizar a colaboración conxunta
- Un catálogo creado para o colectivo con solucións a medida e a experiencia da súa unidade especializada ABANCA Mar, o activo da entidade
O director de zona de ABANCA na Mariña-Terra Chá, José Ángel Méndez (segundo pola esquerda), durante a firma coas confrarías de Lugo.
Descarga en alta resolución Serás redirixido a outro sitio web e abrirase nunha nova ventá
Instante da reunión coas confrarías de Lugo, onde participaron distintos representantes de ABANCA.
Descarga en alta resolución Serás redirixido a outro sitio web e abrirase nunha nova ventá
ABANCA volve impulsar o seu traballo conxunto coas principais confrarías da Mariña, tras activar a renovación dos convenios de colaboración que mantén cos pósitos máis relevantes da provincia. O escenario elixido para a sinatura foi a vixésima edición de Expomar, a feira especializada no sector que se celebra estes días en Burela.
O director de zona de ABANCA na Mariña-Terra Chá, José Ángel Méndez, foi o encargado de renovar os novos convenios cos principais responsables das confrarías de pescadores de Celeiro, O Vicedo, Foz, Burela, Ribadeo e San Cibrao e coa Federación Provincial de Pescadores de Lugo. Na sinatura tamén participaron o director de ABANCA Mar, Javier Fraga, así como outros representantes desta unidade especializada e do banco.
Tras a renovación dos convenios, tivo lugar unha charla para deseñar novas alternativas de financiamento para o colectivo, na que ABANCA reivindicou o seu compromiso coas cofrarías de todo o país, xa que o patrón maior da Confraría de Pescadores de Burela e presidente da Federación Provincial de Pescadores de Lugo é tamén presidente da Federación Nacional de Cofradías.
O banco mantén un ano máis o diálogo directo co colectivo e propón solucións aos pósitos lucenses ante os seus retos máis acuciantes. Os acordos recentemente renovados permiten seguir apoiando o sector a través dunha ampla oferta de produtos e servizos adaptados ao mundo do mar. Proba desta proximidade ao sector e experiencia no coñecemento das súas necesidades son as renovadas fórmulas de crédito que se converten en estímulo ante situacións como os paros biolóxicos ou a baixa produtividade nas rías.
Nesta mesma liña, o banco tamén se puxo a disposición das confrarías un ano máis para o anticipo dos fondos FEMPA, con produtos axustados e competitivos aliñados, nesta ocasión tamén, cos investimentos sostibles que realiza o sector.
Pero ademais destes retos vinculados á situación actual das confrarías, o banco tamén pon á súa disposición a súa experiencia para impulsar os retos estratéxicos dos pósitos. Para iso, ofrece solucións financeiras para abordar a construción de novas embarcacións ou a renovación das actuais a través dun produto especializado como é a hipoteca naval. Todo iso sen esquecer a súa aposta por outros procesos transversais que está a vivir o mundo do mar, como o apoio ao relevo xeracional.
A entidade financeira ten unha proposta única para dar resposta aos retos do sector, a través da súa unidade especializada ABANCA Mar. Con catálogo propio e xestores especializados, atende as diferentes necesidades dos profesionais e empresas de toda a cadea do mar.