ABANCA reúne en Lugo ao seu comité de dirección con motivo do San Froilán

07-10-2019

O comité de dirección de ABANCA, o máximo órgano directivo da entidade tras o consello de administración, trasladou hoxe a súa xornada de traballo a Lugo para sumarse á celebración de San Froilán, unha das festas patronais máis tradicionais e multitudinarias de Galicia.

O alto órgano de ABANCA, integrado polo conselleiro delegado, Francisco Botas, e 14 directores xerais, desprazouse ao mediodía ao recinto feiral de San Froilán acompañado da alcaldesa lucense, Lara Méndez; o director territorial de ABANCA en Lugo, Javier Soto, e varios responsables de negocio da entidade nesta provincia. No seu percorrido pola zona de festas aproveitaron para visitar algunhas das clásicas casetas e degustar o prato típico do polbo, acompañando aos lucenses e visitantes que abarrotaban o recinto para gozar dos festexos patronais.

O programa da tarde do comité de dirección da entidade financeira en Lugo comezou coa visita a un dos talleres formativos sobre banca móbil dirixidos a persoas maiores que se desenvolven no Espazo +60 da Obra Social ABANCASerás redirixido a outro sitio web na cidade amurallada. A alta dirección de ABANCA quixo participar con este xesto na conmemoración do Día da Educación Financeira, unha efeméride que marcou tamén o inicio do programa de educación financeira que o banco e a súa Obra Social Afundación desenvolverán ao longo do curso 2019-2020.

A continuación, o comité de dirección celebrou a súa habitual reunión semanal, na que se abordan asuntos estratéxicos e operativos relevantes para a entidade e faise seguimento do día a día do negocio. Ao termo desta sesión, desenvolveuse o comité de investimentos, no que se revisaron e sancionaron diversas operacións de crédito.

Encontro co equipo comercial

Posteriormente, o comité de dirección de ABANCA participou nun encontro de traballo da Territorial de Lugo con máis dun centenar de profesionais da rede de oficinas da entidade nesta provincia. Durante esta reunión, o conselleiro delegado e os directores xerais compartiron co equipo comercial os datos de evolución das principais magnitudes de negocio do banco no que vai de ano e as prioridades para este último trimestre.

Así mesmo, os directivos revisaron cos compañeiros e compañeiras da área comercial as cifras máis relevantes da actividade do banco na provincia lucense durante este 2019. Entre os datos analizados destaca o crecemento en crédito, especialmente significativo en operacións de circulante a empresas, que rexistran un incremento anual superior ao 20%, e en financiamento ao segmento de negocios, cuxo volume ata agosto creceu un 29% con respecto ao mesmo período do ano anterior. Gran parte deste avance do crédito susténtase en financiamento a sectores estratéxicos para a provincia e o tecido industrial lucense, como poden ser agro e mar, cuxo volume de investimento crece ao peche de agosto un 25% e un 70% interanual, respectivamente.

Compromiso con Lugo

ABANCA presta servizo a particulares e empresas en Lugo a través dunha rede comercial de 67 oficinas, entre as que se inclúe un centro especializado en empresas, e un equipo formado por máis de 300 profesionais.

Ademais do apoio financeiro, o compromiso de ABANCA con Lugo queda patente a través de diferentes iniciativas no ámbito da cultura e o deporte. No marco do seu plan de apoio ás festas de interese turístico de Galicia e da cultura popular deste territorio, a entidade financeira galega contribúe de forma significativa á promoción das festas de San Froilán e Arde Lucus. Polo que respecta ao deporte, o banco é patrocinador dos principais clubs lucenses, o CD Lugo e o CB Breogán, e apoia a un total de 17 clubs deportivos nesta provincia a través do seu Programa ABANCA Deporte BaseSerás redirixido a outro sitio web.