ABANCA reúnese na Habana coas comunidades galegas no exterior
- Francisco Botas: “Este encontro permitiunos coñecer mellor e trasladarlles todo o noso apoio aos miles de galegos e galegas que residen e traballan noutros países”
- A iniciativa forma parte da estratexia desenvolvida por ABANCA para contribuír a estreitar os lazos económicos entre Galicia e os países de destino da súa emigración
- ABANCA ten clientes activos en 150 países
De esquerda a dereita, o director de No Residentes de ABANCA, Alberto Cacharrón; o director xeral de Internacional de ABANCA, Alfonso Caruana e o conselleiro delegado de ABANCA, Francisco Botas.
Representantes de ABANCA, encabezados polo seu conselleiro delegado, Francisco Botas, mantiveron onte un encontro coa emigración galega na Habana no marco da celebración do XI Plenario do Consello de Comunidades Galegas. “Este encontro permitiunos coñecer mellor e trasladarlles todo o noso apoio aos miles de galegos e galegas que residen e traballan noutros países”, sinalou Francisco Botas.
A iniciativa forma parte da estratexia desenvolvida por ABANCA para contribuír a estreitar os lazos entre Galicia e as comunidades galegas residentes no exterior. A través da súa actividade como entidade financeira, ABANCA presta apoio á actividade económica dos emigrantes galegos en diferentes países, fomenta a internacionalización das empresas galegas e contribúe á dinamización das relacións entre os empresarios galegos residentes en Galicia e outros países. A entidade financeira galega ten clientes repartidos por 150 países.
O Consello de Comunidades Galegas, órgano representativo das comunidades galegas asentadas fóra de Galicia, está integrado por representantes da emigración, a administración, a cultura e a universidade galega.
O evento, que reuniu a todas as comunidades galegas, contou coa presenza de 225 participantes entre representantes da Xunta de Galicia, presidentes das comunidades galegas no exterior e embaixadores de diferentes países en Cuba, entre eles o de España, Juan Francisco Montalbán.