ABANCA robustece o seu negocio de banca persoal coa compra da rede española do Grupo Novo Banco

05-04-2021

ABANCA acaba de pechar con Novo Banco S.A. a compravenda do negocio do banco portugués en España. Con esta operación, a entidade alcanza os 100.000 millóns de euros de volume de negocio e reforzará o seu posicionamento en dous ámbitos de actividade prioritarios: o negocio de banca persoal e privada e o negocio de empresas. A compra presenta un baixo risco de execución e mínimo consumo de capital.

Tras a operación, ABANCA terá un volume de activos de 71.338 millóns de euros e xestionará 42.368 millóns de crédito á clientela, 46.037 millóns de depósitos e 11.789 millóns en pasivo fóra de balance. Contará con 6.312 empregados e 745 oficinas.

Novo Banco España aporta un volume de negocio de 4.287 millóns. Dispón de 10 oficinas situadas en contornas urbanas con especialidade en banca persoal, privada, de empresas, corporativa e institucional. Conta cun persoal formado por 172 empregados e unha rede de 102 axentes financeiros especializados.

A operación que se pechou queda suxeita á obtención das autorizacións regulatorias correspondentes e á realización do proceso de integración, campo no que ABANCA acumula unha contrastada experiencia nos últimos anos.

Operación complementaria en negocio

A operación robustece o posicionamento de ABANCA en España, moi especialmente en Madrid; e en segmentos de negocio que son estratéxicos para a entidade. O primeiro é o negocio de banca Persoal e Privada que xa creceu nos últimos anos co desenvolvemento previsto no seu Plan Estratéxico e coas compras da rede de Deutsche Bank PCB en Portugal, a de Banco Caixa Geral en España e, máis recentemente coa adquisición de Bankoa. O segundo dos eixos que se verá reforzado coa compra da rede española de Novo Banco é o negocio de empresas, especialmente na operatoria fóra de balance e a actividade exterior.

Ademais, Novo Banco achegará potencial de crecemento en liñas como a actividade aseguradora. O negocio asegurador atópase en pleno crecemento en ABANCA tras o relanzamento da compañía de Vida e a creación de ABANCA Seguros Generales conxuntamente con Crédit Agricole Assurances, que xa conta co permiso para operar e que lanzará os seus primeiros produtos propios nas próximas semanas.

As importantes sinerxías que presenta a operación permitirán a ABANCA avanzar na mellora da súa eficiencia.

Sexta operación corporativa desde 2014

ABANCA ten probado con éxito o seu modelo de integración doutras entidades nas operacións corporativas que realizou nos últimos anos. A primeira foi a integración en 2014 do Banco Etcheverría; en 2017 realizouse a compra de Popular Servicios Financieros; en 2018, ABANCA adquiriu Deutsche Bank PCB, e tamén en 2018 comprou á Caixa Geral de Depósitos o seu banco en España, Banco Caixa Geral. En 2020, produciuse a compra de Bankoa cuxo proceso de integración a ABANCA finalizará durante o cuarto trimestres de 2021.