ABANCA subscribe un acordo preliminar co Grupo Crédit Agricole para adquirir Bankoa

31-07-2020

ABANCA está a negociar e subscribiu un acordo preliminar co Grupo Crédit Agricole para a compra das accións que este último posúe en Bankoa. O acordo prodúcese unha vez finalizada, satisfactoriamente para ABANCA, a due diligence sobre a situación da entidade vasca. A negociación culminará, no seu caso, cun acordo firme para a adquisición de Bankoa, que quedaría suxeita ás condicións suspensivas habituais neste tipo de operacións.

Coa compra, ABANCA adquiriría o negocio bancario minorista de Crédit Agricole en España e reforzaría o seu posicionamento no País Vasco. A entidade galega aumentaría en 4.374 millóns o volume de negocio até situalo en 93.000 millóns de euros. En activos consolidaríase como a sétima entidade española con máis de 65.000 millóns.

Esta potencial operación profunda no acordo estratéxico entre ABANCA e Crédit Agricole asinado hai dous anos, cuxo primeiro froito foi a compañía conxunta que xestionará os seguros xerais no mercado español e portugués os próximos 30 anos.

Bankoa: modelo centrado en empresas e patrimonio

Bankoa naceu en 1975 como un banco industrial e atópase profundamente arraigado no tecido empresarial do País Vasco e Navarra. Na actualidade, desenvolve un modelo de negocio especializado e centrado en empresas, pemes e xestión de patrimonios. Conta con 4.374 millóns de euros de volume de negocio, do que 1.788 millóns corresponden ao crédito á clientela, 1.575 millóns de euros a depósitos da clientela e 1.011 millóns son fondos fóra de balance.

A entidade destaca pola súa solvencia; rendibilidade; a calidade dos seus activos; a recorrencia e estabilidade nos seus ingresos, e pola atención próxima aos seus clientes. O persoal da entidade está formado por 257 profesionais moi cualificados e de experiencia contrastada. O equipo seguirá coa xestión do día a día do banco despois da integración. Prestan servizo a máis de 40.000 clientes particulares e empresas.

Reforzo no País Vasco

Coa adquisición de Bankoa, ABANCA reforzaría a súa presenza no País Vasco. A entidade galega multiplicaría por sete a súa presenza na comunidade, onde actualmente conta cunha rede de cinco oficinas.

ABANCA ten como obxectivo crecer nun dos territorios máis dinámicos de España. A comunidade vasca é a rexión española con mellor rating e o seu PIB per cápita é un 30% superior á media nacional.

Como parte da operación, ABANCA e Crédit Agricole tamén asinarían un acordo de colaboración comercial que permitirá aos clientes de Bankoa beneficiarse das capacidades de ambos os grupos tanto no mercado español como noutros países onde están presentes.

Bankoa ten o seu domicilio social en Donostia-San Sebastián (Guipúscoa) e dispón de 30 oficinas situadas maioritariamente no País Vasco, ademais de en Navarra, A Rioxa e Madrid, concentradas en contornas urbanas e en municipios con tecido empresarial.

Operación complementaria en rede e en negocio

A culminación da compra suporía un paso máis no proceso de crecemento de ABANCA, tras a integración de Banco Caixa Geral en marzo deste ano e da rede de Deutsche Bank PCB Portugal en xuño de 2019, e é complementaria co modelo e a estratexia de ABANCA.

Ademais de complementar e aumentar a súa rede, a compra reforzaría segmentos de negocio que son estratéxicos para ABANCA, como empresas e xestión de patrimonios, e achega potencial de crecemento en liñas como circulante, negocios, consumo e seguros. Outro aspecto de valor da operación para ABANCA é o incremento da súa presenza na cornisa cantábrica, unha prioridade do deseño estratéxico da entidade desde o seu nacemento en 2014.

Unha vez se alcance un acordo definitivo para a compravenda, iniciarase o proceso de obtención das autorizacións administrativas correspondentes. A partir de aí, comenzará a integración, campo no que acumula unha contrastada experiencia nos últimos anos.