ABANCA súmase ao programa de Funcas para promover a educación financeira
- Ambas as dúas institucións subscribiron un acordo co obxectivo de mellorar os coñecementos financeiros da cidadanía
- O banco consolidará as accións do seu programa de educación financeira e promoverá dúas novas iniciativas formativas dirixidas a nenos e estudantes preuniversitarios: 'Seguramente ABANCA' e 'ABANCA Young Business Talents'
De esquerda a dereita, Miguel Ángel Escotet, director xeral de RSC e Comunicación de ABANCA e presidente de Afundación, e Carlos Ocaña, director xeral de Funcas, na firma do acordo.
O director xeral de Responsabilidade Social Corporativa e Comunicación de ABANCA e presidente de Afundación, Miguel Ángel Escotet, e o director xeral da Fundación de las Cajas de Ahorros (Funcas), Carlos Ocaña, asinaron hoxe o convenio polo que a entidade financeira adhírese ao ‘Programa Funcas de Estímulo de la Educación Financiera’. Con este acordo, ambas as dúas institucións pretenden colaborar na mellora do nivel e a calidade da educación financeira dos cidadáns mediante a consolidación de proxectos existentes e o desenvolvemento doutros novos.
O ‘Programa Funcas de Estímulo de la Educación Financiera’, dotado en total con tres millóns de euros e lanzado este ano por Funcas e CECA -a asociación de caixas e bancos creados polas caixas-, contribúe a financiar as actividades de educación financeira que desenvolven as entidades adheridas á Asociación, entre as que se atopa ABANCA.
Grazas a este acordo, o banco dará un impulso ao programa educativo que desenvolve en colaboración con Afundación desde o ano 2015 e que suma xa máis de 31.000 beneficiarios. En concreto, no marco do convenio, porá en marcha dúas novas iniciativas neste ámbito formativo, ‘SeguraMente ABANCA’ e ‘ABANCA Young Business Talents’.
O primeiro programa está dirixido a sensibilizar a escolares de primaria, secundaria e formación profesional básica da importancia de previr riscos e como os seguros nos poden axudar a afrontar os imprevistos da vida. A segunda acción, ‘ABANCA Young Business Talents’, ten como obxectivo achegar a xestión empresarial aos novos estudantes preuniversitarios (4º ESO, bacharelato e formación profesional) a través dun simulador que permitirá aos participantes vivir a experiencia de xestionar unha empresa.
O director xeral de Responsabilidade Social Corporativa e Comunicación de ABANCA e presidente de Afundación, Miguel Ángel Escotet, subliñou que “mellorar os coñecementos financeiros de toda a poboación é unha das liñas estratéxicas de actuación do banco no ámbito da RSC e con ese obxectivo no horizonte a entidade puxo en marcha múltiples accións para chegar a todos os colectivos con formatos innovadores como o uso das artes escénicas ou a gamificación para empezar a concienciar desde as idades máis temperás”.
Pola súa banda, o director xeral de Funcas, Carlos Ocaña, sinalou que “o obxectivo do programa é contribuír á redución do déficit de competencias financeiras que ten unha parte da poboación española proporcionando ferramentas para que os cidadáns tomen mellores decisións na xestión do seu diñeiro”.
Programa universal e inclusivo
O programa de educación financeira de ABANCA caracterízase por unha oferta de actividades ampla e variada que ten como obxectivo mellorar a formación financeira da cidadanía independentemente da súa idade. Ademais, co fin de promover a igualdade de oportunidades, este ano incorporouse ao programa aos membros da asociación Down Coruña e está previsto que continúe ampliándose a outros colectivos vulnerables.
Entre as iniciativas que se integran nesta liña de traballo atópanse propostas dirixidas ao público infantil como as obras de teatro ‘Laberinto’ e ‘De los cuentos a las cuentas’ ou o Gran Prix Financiero, unha adaptación do xogo da oca que permite aos escolares de menor idade achegarse a estes conceptos de maneira lúdica e empezar a tomar conciencia da importancia de xestionar correctamente as finanzas persoais e familiares.
Para os estudantes de secundaria e bacharelato organízanse durante o curso charlas e conferencias sobre economía básica e para o colectivo de maiores de 55 anos a oferta céntrase en talleres que lles ofrecen a formación necesaria para que poidan utilizar as novas tecnoloxías para mellorar o control das súas finanzas persoais.
O programa de educación financeira de ABANCA foi recoñecido en dúas ocasións nos premios á Obra Social e á Educación Financeira que organiza a revista Actualidad Económica en colaboración coa Confederación Española de Cajas de Ahorros (CECA). En 2016 recibiu o galardón á mellor iniciativa para mozas polo uso das artes escénicas e en 2017 foi premiado na categoría de maiores polas actividades organizadas para mellorar a cultura financeira das persoas de idade avanzada.