ABANCA traslada ás confrarías do norte de Pontevedra o seu plan de crédito para mellorar a competitividade e sostibilidade do sector
- O banco renova o acordo de colaboración que garante aos pósitos de Pontevedra e O Salnés e á Lonxa de Campelo o acceso a condicións especiais de financiamento
- A entidade reforza a súa estratexia de apoio ao sector pesqueiro e marisqueiro con solucións financeiras adaptadas para cubrir necesidades como renovación de frota, diminucións de actividade ou anticipos de axudas por paros biolóxicos
Representantes das confrarías do norte de Pontevedra e de ABANCA, durante o encontro.
Carmen Fernández e Javier Fraga (ao fondo) charlan cos representantes das confrarías de pescadores.
ABANCA acordou un novo plan de apoio financeiro coas confrarías de pescadores do norte de Pontevedra e a Lonxa de Campelo. Este acordo garante aos profesionais integrados nestas organizacións sectoriais o acceso a unha oferta financeira con condicións especiais, adaptada ás necesidades da pesca e o marisqueo, e orientada a mellorar a súa competitividade e sustentabilidade.
Este marco de colaboración foi reactivado nun encontro celebrado esta tarde en Pontevedra, no que participaron a directora territorial de ABANCA en Pontevedra, Carmen Fernández Penas, e representantes das confrarías de Pontevedra, Lourizán, Marín, Vilaboa, Campelo, Raxó, Sanxenxo, Portonovo, Vilanova, Vilaxoán, O Grove, A Illa, e Cambados, e da Lonxa de Campelo. Tamén participaron no acto o director de ABANCA Mar, Javier Fraga, así como varios directores de zona e de oficinas, coordinadores de negocio e xestores da rede comercial de ABANCA na zona norte de Pontevedra.
Apoio financeiro integral e adaptado
A oferta financeira acordada con estas organizacións sectoriais pon o acento no acceso ao crédito en condicións melloradas, con produtos e solucións de crédito adaptados ás particularidades de cada colectivo e focalizados na súa mellora competitiva e a súa transición cara a un modelo máis sostible. Desta forma, ABANCA Mar, a unidade de negocio do banco especializada na cadea de valor do mar, pon ao dispor das confrarías do norte da provincia e da Lonxa de Campelo fórmulas flexibles de crédito para facilitar a renovación de frota e a construción de embarcacións e instalacións máis eficientes e con menor pegada nos ecosistemas, así como para investimentos sostibles. Entre outras opcións, destacan a hipoteca naval, que permite introducir prazos amplos ou carencias, en función das particularidades de cada operación; pólizas de crédito en condicións especiais para financiar as fases iniciais de construción de embarcacións, ou anticipos de financiamento sostible.
Do mesmo xeito, o banco ofrece outros produtos específicos para dar resposta a necesidades particulares destes colectivos, como pólizas de crédito que permiten paliar as consecuencias de paros biolóxicos no sector pesqueiro, caídas de produción no sector armador ou o cesamento ou diminución de actividade marisqueira. Os protocolos asinados tamén garanten o acceso a outros produtos, como préstamos persoais a medida para o sector, anticipos de subvencións, leasing mobiliario, liñas de comercio exterior, Confir-MAR, avais ou liñas de desconto.
Neste marco de colaboración inclúense, ademais, opcións de aseguramento para os profesionais do sector pesqueiro e marisqueiro representados polas organizacións asinantes, así como solucións de financiamento a través dos convenios oficiais que ABANCA mantén co ICO, as sociedades de garantía recíproca (SGR) galegas ou a Sociedade Anónima Estatal de Caución Agraria (Saeca).
Acceso ás axudas europeas
Ademais de referendar os acordos de colaboración que unen á entidade con estes colectivos e dar a coñecer as novidades do plan de apoio financeiro, este encontro serviu tamén para poñer en común os desafíos actuais do sector e establecer novas vías de traballo conxunto. Neste sentido, os representantes de ABANCA explicaron que unha das liñas de actuación prioritarias no banco é o apoio ao tecido produtivo para facilitarlle o acceso ás axudas dos fondos europeos de recuperación Next Generation EU.
A través das unidades especializadas Next Generation ABANCA e ABANCA Mar, a entidade financeira apoia aos clientes tanto no deseño das súas propostas (facilitando o acceso á información, axudando na selección de proxectos e asesorando financeiramente), como na canalización dos recursos (con financiamento a longo prazo e anticipada). Entre as últimas iniciativas impulsadas polo banco neste ámbito destaca a organización dunha xornada divulgativa sobre o Proxecto Estratéxico para a Recuperación e Transformación Económica (PERTE) do sector agroalimentario, coa participación de Next Generation ABANCA, Analistas Financeiros Internacionais (AFI) e a Unidade de Seguimento do Plan de Recuperación, Transformación e Resiliencia (PRTR) do Goberno.