ABANCA únese ao Clúster Marítimo de Canarias para potenciar a economía azul na rexión
- O banco pon os seus servizos financeiros e o seu coñecemento especializado á disposición dos asociados do clúster e promoverá iniciativas para o desenvolvemento sostible da industria marítima canaria
O acordo foi asinado por María del Carmen Peral Escobio, directora de empresas de Canarias en ABANCA, e Vicente Marrero, presidente do Clúster Marítimo de Canarias.
O Clúster Marítimo de Canarias (CMC) acaba de ratificar a entrada de ABANCA como novo socio estratéxico durante a súa última Asemblea Xeral Extraordinaria. O acordo foi asinado por María del Carmen Peral Escobio, directora de empresas de Canarias en ABANCA, e Vicente Marrero, presidente do clúster, quen acaba de renovar o seu cargo.
Con esta firma, ABANCA reforza o seu compromiso co desenvolvemento da economía azul e, máis especificamente, co fomento dos subsectores marítimos en Canarias, incluíndo a reparación naval, o transporte marítimo, infraestruturas e servizos portuarios, enerxías renovables mariñas, náutica deportiva e de lecer, pesca e acuicultura.
A entidade financeira, mediante a súa unidade especializada ABANCA Mar, poñerá á disposición de todos os asociados do clúster os seus servizos financeiros e promoverá iniciativas para o desenvolvemento de novos proxectos vinculados á economía azul. “Esta colaboración estratéxica implica un compromiso para traballar conxuntamente no crecemento sostible da industria marítima canaria”, explica Javier Fraga, director de ABANCA Mar.
Novas oportunidades de crecemento para as empresas asociada
O Clúster Marítimo de Canarias busca favorecer o desenvolvemento e a competitividade internacional do sector mariño-marítimo de Canarias, baseándose en valores como a cooperación, o compromiso, a comunicación e a competitividade. As actividades do clúster inclúen a vinculación entre os distintos actores do sector; o acceso a proxectos de interese común a nivel nacional, europeo e internacional; a identificación de tendencias e necesidades do mercado, e a facilitación de alianzas nacionais e internacionais. Ademais, proporciona acceso a información relevante para o sector a través de xornadas informativas, webinars e asistencia exclusiva para os asociados.
A inclusión de ABANCA como socio do clúster é un paso importante para fortalecer a economía azul na rexión e brindar novas oportunidades de crecemento e desenvolvemento ás empresas asociadas.