Bankoa ABANCA e o Foro Marítimo Vasco reforzan a súa alianza financeira para promover a economía azul no País Vasco
- A entidade financeira pon a disposición do Clúster da Industria Marítima do País Vasco solucións de crédito adaptadas para impulsar a transformación do sector e a súa mellora competitiva
- Armadores, estaleiros e industria auxiliar poderán optar a financiamento flexible e a medida para renovación de frota e investimentos sostibles
O director xerente do Foro Marítimo Vasco, Javier López de Lacalle (esquerda), e o director xeral de Bankoa ABANCA, Jesús Suárez, durante a firma do convenio.
Bankoa ABANCA e o Foro Marítimo Vasco, o Clúster da Industria Marítima do País Vasco, renovaron esta mañá en Donostia-San Sebastián o acordo de colaboración que une a ambas as entidades co obxectivo de mellorar a competitividade e transformación do sector mediante alternativas de crédito e produtos financeiros adaptados ás súas particularidades. A nova alianza pon énfase no impulso de investimentos sostibles e, particularmente, no proceso de renovación da frota.
Os termos do acordo detállanse nun convenio rubricado polo director xeral de Bankoa ABANCA, Jesús Suárez, e o director xerente de Foro Marítimo Vasco, Javier López de Lacalle, nun acto no que tamén participou Miguel Eraso García, coordinador de ABANCA Mar, a unidade de negocio de ABANCA especializada na cadea de valor do mar.
Grazas a esta liña de colaboración, os máis de 150 asociados desta agrupación industrial, que representan a preto de 240 empresas do sector, terán á súa disposición unha ampla oferta de produtos e servizos financeiros deseñados para dar resposta ás súas particularidades e necesidades puntuais. Entre outros produtos, o protocolo dará acceso a armadores, estaleiros e industria auxiliar do sector a financiamento flexible e vantaxoso como a hipoteca naval, unha alternativa de crédito do catálogo, con amplos prazos ou carencias que ofrece Bankoa ABANCA para incentivar a construción de novas embarcacións, a remodelación ou a segunda adquisición de barcos máis eficientes e respectuosos co medio ambiente.
Este novo acordo permite tamén ás empresas integradas no Foro Marítimo Vasco optar a crédito en condicións especiais para acometer investimentos sostibles e de mellora da eficiencia enerxética, así como opcións a medida para financiamento de circulante, anticipos de axudas públicas ou pago de impostos, leasing mobiliario, avais, confirming ou liñas de comercio exterior específicos para o sector marítimo-pesqueiro.
Apoio na recuperación
O banco é socio do Foro Marítimo Vasco desde 2018, ano no que ambas as entidades estableceron un marco de colaboración estreito para dar resposta ás demandas financeiras desta agrupación industrial. Esta interlocución continuada permite a ABANCA Mar coñecer de primeira man as necesidades deste elo da cadea de valor do mar e adaptar o seu catálogo con produtos e servizos personalizados.
O acompañamento de Bankoa ABANCA cobra especial relevancia no actual contexto de reconstrución tras a crise económica derivada da pandemia por COVID-19. O banco pon ao dispor do tecido empresarial a súa rede de 36 centros no País Vasco e Navarra e un amplo equipo de especialistas para ofrecerlles as mellores solucións financeiras. Ademais, en coordinación coa súa área de Next Generation, a entidade financeira axuda ás empresas na xestión dos proxectos que poden optar aos fondos europeos de recuperación e ofrécelles solucións a medida para impulsar novos investimentos.