CECA premia na súa convocatoria nacional dous programas de educación financeira de Afundación e ABANCA

15-12-2022

A Confederación Española de Caixas de Aforro (CECA) recoñeceu a ABANCA e a súa Obra Social, Afundación, nunha gala de entrega celebrada este mediodía na súa sede social en Madrid, co primeiro premio na categoría de nenos e mozos na área de Educación Financeira. O director xerente de Afundación, Pedro Otero, recolleu o galardón que distingue os programas «Grand Prix financeiro» e «A tola aventura do aforro»Serás redirixido a outro sitio web. Os premios, que se entregan a nivel nacional, recoñecen anualmente o labor daquelas entidades e fundacións que demostraron un alto grao de compromiso coa sociedade e, en particular, cos colectivos máis vulnerables.

Nesta edición entregáronse premios en dez categorías e dous premios especiais. Na área de obra social, nos apartados de acción social, cultura e patrimonio, deporte e lecer, desenvolvemento local e creación de emprego, educación e investigación e medioambiente. Mentres, na área de educación financeira, distinguíronse as categorías de nenos e novos, adultos, maiores e emprendedores. Ademais, outorgáronse dous premios especiais do xurado á traxectoria da Obra Social e á promoción e divulgación da Educación Financeira.

Gran Prix Financeiro e A tola aventura do aforro

Os programas «Gran Prix financeiro», en formato presencial, e «A tola aventura do aforro», a súa versión dixital, nacen co obxectivo de achegar ás aulas de todo o territorio español, a educación financeira aplicada á vida real. En ambos, a través de contornas gamificadas, os escolares aprenden a xestionar o diñeiro dunha forma responsable, planificar os gastos, tomar decisións ou a distinguir entre desexos e necesidades, sempre desde unha educación en valores que sente unhas bases útiles na vida adulta. En ambos os proxectos participaron xa máis de 109.000 estudantes e docentes de máis de 1400 centros educativos de toda España.

A iniciativa forma parte do programa de educación financeira de ABANCA e Afundación que ten un carácter universal e inclusivo e conta con actividades adaptadas ás necesidades de formación en finanzas que presentan os diferentes colectivos sociais en función da etapa da vida na que se atopan, desde a infancia ata os maiores de 60 anos. A programación deséñase ao redor de catro grandes eixos: aprender a xestionar o diñeiro, aprender a xestionar riscos, saúde e alfabetización financeira, e fomento da cultura emprendedora.