Educa e ABANCA entregan os VI Premios EDUCA ABANCA aos mellores docentes de 2022

04-03-2023

A plataforma educativa Educa e a Obra Social ABANCA entregaron esta tarde na Sede de Afundación da Coruña os VI Premios EDUCA ABANCA aos mellores docentes de 2022.

Educa, en colaboración con Afundación, impulsa desde 2017 esta iniciativa co fin de render unha merecida homenaxe a todos os profesionais do ámbito educativo que desempeñan o seu labor nas diferentes etapas da formación académica regrada e tamén na educación non formal.

A gala de entrega desta sexta edición dos galardóns reuniu a 250 persoas entre premiados, docentes e un nutrido grupo de representantes institucionais entre os que se atopaban o presidente da Xunta de Galicia, Alfonso Rueda; a ministra de Educación e Formación Profesional, Pilar Alegría; o delegado do Goberno en Galicia, José Manuel Miñones; o conselleiro de Educación da Xunta de Galicia, Román Rodríguez; a alcaldesa da Coruña, Inés Rey; o director xeral de Responsabilidade Social, Sostibilidade e Comunicación de ABANCA, reitor da Universidad Intercontinental de la Empresa e presidente de Afundación, Miguel Ángel Escotet, e o director xeral da plataforma Educa, Víctor Arufe.

Ademais de entregar o galardón aos sete docentes premiados nas diferentes categorías establecidas, na gala realizouse un recoñecemento especial a todos os profesores e profesoras que quedaron finalistas. En total, 61 profesionais que desenvolven o seu traballo en localidades de diferentes puntos da xeografía española foron distinguidos pola súa boa práctica docente e a dedicación á súa profesión.

Ana María González Herrera, profesora no CEIP Maestro Eduardo Lobillo de Rota (Andalucía) recolleu o premio na categoría de Educación Infantil. Luis Gutiérrez Martín, mestre no Colegio Marista San José de León (Castilla y León), foi o gañador na categoría de Educación Primaria. Susana Díaz Morcillo, profesora no IES José Manzano de Don Benito (Extremadura), recibiu o galardón no apartado de Educación Secundaria. Alberto Castellano Barragán, docente no IES Virgen de la Esperanza de La Línea de la Concepción (Andalucía), foi recoñecido na categoría de Formación Profesional. Rubén Martínez Sánchez, mestre nos centros ONG Mentor e Lideria International School de Puerto Lumbreras (Murcia), alzouse co premiona categoría de Educación non formal. Por último, Manuel Cuadrado García, profesor na Universidad de Valencia (Comunidad Valenciana), objetivo o recoñecemento na categoría de Universidade.

Cada un recibiu unha figura conmemorativa EDUCA, un diploma acreditativo e un premio en metálico.

Como broche final, entregouse a mención honorífica á traxectoria docente a María Pilar Montero Yus, profesora xubilada que dirixiu o CEIP Nertóbriga de La Almunia de Doña Godina (Zaragoza).

Convocada a sétima edición dos Premios EDUCA ABANCA

Coincidindo coa gala de entrega de galardóns aos mellores docentes de 2022 abriuse o prazo para presentar candidaturas para a sétima edición dos premios, que distinguirán aos profesores que destaquen pola súa boa praxe profesional en 2023.

Calquera estudante pode propoñer para o galardón ao docente que admire pola súa entrega á profesión e o traballo que realiza a través do formulario dispoñible na web www.plataformaeduca.org. No caso das categorías de Educación Infantil e Primaria serán as familias as que deban realizar as propostas.

Os Premios EDUCA ABANCA teñen como obxectivo mellorar a visibilidade da boa práctica docente entre a sociedade e dar voz ao alumnado e ás súas familias á hora de recoñecer a aqueles profesores que destaquen polo seu bo facer. A iniciativa permite enxalzar a figura do bo docente, a súa implicación no proceso de ensino e tamén a importancia do papel que desenvolven estes profesionais na sociedade.