En marcha a restauración do mural de Lugrís na oficina principal de ABANCA na Coruña

11-01-2017

ABANCASerás redirixido a outro sitio web comezou a restauración do mural de Urbano Lugrís ‘Vista de A Coruña 1669’ na oficina principal do banco na Coruña tras finalizar o seu traslado dende o local da rúa Real no que se atopaba e a súa instalación no novo espazo. A empresa ArtecaSerás redirixido a outro sitio web encargarase de todo o proceso de rehabilitación da pintura, que terá unha duración aproximada de dous meses e realizarase de cara ao público.

Os primeiros traballos centráronse en eliminar a pel de protección coa que se cubriu a pintura para evitar danos durante o traslado e descubrir a policromía. O próximo paso será selar os cortes de 2 milímetros realizados para dividir a obra en sete seccións, unha medida necesaria para poder movela dadas as súas elevadas dimensións, 9,20 x 2,40 metros, e o seu peso, máis de 4 toneladas.

A rehabilitación continuará coa limpeza da capa pictórica e a recuperación das zonas escamadas para que volva a quedar tal e como o pintou no seu día o artista.

Cando finalice a restauración, o mural quedará exposto ao público neste mesmo espazo, a entrada á oficina principal da entidade financeira na Coruña pola rúa Olmos, moi próximo á súa situación orixinal e coa mesma orientación, de modo que calquera que desexe gozar coa súa contemplación poida facelo no horario de apertura ao público da oficina.

O compromiso de ABANCA coa conservación e difusión do patrimonio cultural galego foi o detonante para que o banco asuma a responsabilidade e o custo económico de restaurar esta obra, unha demanda histórica dos veciños e veciñas da Coruña que vían como a obra se deterioraba e podía quedar oculta ao público en función da actividade desenvolvida no local.

O mural está catalogado e sobre el incoouse un expediente para a súa posible declaración como Ben de Interese Cultural. O banco recibiu a pintura en comodato e cando finalice a restauración está previsto que se musealice o espazo, de forma que ademais de contemplar o mural se exhiban de forma rotatoria outras obras de Urbano Lugrís da Colección de Arte ABANCASerás redirixido a outro sitio web. Tamén se instalará unha pantalla na que se poderá ver o vídeo de todo o proceso: extracción da parede, tratamento, fortalecemento, traslado, instalación e restauración, e acceder ao resto do contido da Colección ABANCA.