Francisco Botas asume a dirección xeral corporativa de NCG Banco

23-03-2014

O Grupo Banesco nomeou a Francisco Botas Ratera como director xeneral corporativo de NCG Banco coa misión de orientar a entidade cara a unha banca tradicional, sustentable e comprometida co desenvolvemento económico e social de Galicia. A designación de Francisco Botas permite ao Grupo Banesco tomar as decisións necesarias para acelerar o lanzamento do novo proxecto e mellorar o servizo aos clientes.

O equipo directivo que acompañará a Francisco Botas foi acordado despois de concluír todas as avaliacións técnicas e darase a coñecer nos próximos días. No novo organigrama primarase o talento dos empregados tanto do Banco Etcheverría como de NCG Banco.

A decisión, tomada a proposta do FROB, prodúcese nestes momentos porque o período intermedio previsto no contrato de compravenda de NCG vaise extender máis aló da primeira estimación, á espera da aprobación definitiva por parte da Comisión Europea.

Francisco Botas Ratera (Ferrol, 1967) é licenciado en Ciencias Económicas, Empresariais e Dereito pola Universidade Pontificia Comillas (ICADE E-3) e alcanzou un C. Degree en International Business Finance na Berkeley University. Comezou a súa vida profesional como auditor en KPMG Peat Marwick. En 1992 incorporouse a Mac Group-Gemini como consultor de Estratexia Corporativa e Finanzas e en 1996 entra en Inditex coa responsabilidade de Business Manager no Departamento Internacional.

En 1998 ficha polo Banco Etcheverría como director xeneral e en 2007 é nomeado conselleiro delegado.  Baixo a súa xestión, e con Javier Etcheverría como presidente, o Banco Etcheverría viviu o maior crecemento dos seus trescentos anos de historia, e converteuse nun referente en España polo seu modelo de xestión baseado na banca tradicional e os valores da prudencia, proximidade, servizo e transparencia. Valores que permitiron ao Banco Etcheverría afrontar os últimos anos de crise cos mellores ratios do sector financeiro en España.

Francisco Botas negociou a entrada de Banesco como principal accionista do Banco Etcheverría en decembro de 2012. En maio de 2013, Banco Etcheverría Grupo Banesco formalizou a compra de 67 oficinas de NCG Rede Neve fora de Galicia. En decembro de 2013, e despois dun duro proceso de privatización,  Grupo Banesco resulta adxudicatario de NCG Banco co compromiso de manter a xestión, a sede, a obra social en Galicia, e o emprego. A entidade aborda a concesión de novos créditos a familias e pemes por un importe superior aos 12.500 millóns de euros.

A súa sintonía con Juan Carlos Escotet, presidente do Grupo Banesco, é total. Tanto Juan Carlos Escotet como Francisco Botas explicaron nos últimos meses que o seu obxectivo é crear un grupo líder no mercado bancario do noroeste, capaz de fortalecer os lazos económicos entre España e Latinoamérica.