Juan Carlos Escotet e Francisco Botas reúnense cos equipos comerciais de Bankoa ABANCA

O presidente de ABANCA, Juan Carlos Escotet Rodríguez, e o conselleiro delegado, Francisco Botas, mantiveron esta tarde en Donostia/San Sebastián un encontro de traballo cos equipos comerciais de Bankoa ABANCA, no que se repasaron os fitos máis importantes alcanzados en 2022 e compartíronse as prioridades de negocio para este ano.

A sesión, que reuniu a máis dun centenar de profesionais do País Vasco, Navarra e A Rioxa, contou tamén coa participación do director xeral de Bankoa ABANCA, Jesús Suárez, e o director comercial, José Luis Barca, ademais do director xeral Comercial de ABANCA, Gabriel González Eiroa, e de responsables de diferentes áreas de apoio ao negocio de ABANCA. Tamén estivo presente o presidente do consello asesor de Bankoa ABANCA, Juan José Etxeberría.

Nas súas intervencións, Juan Carlos Escotet Rodríguez e Francisco Botas analizaron cos equipos as perspectivas macroeconómicas no actual contexto de desaceleración, resaltando a posición de solidez e alta resiliencia do País Vasco, un territorio crave na estratexia de ABANCA. Seguidamente, detallaron a evolución dos principais indicadores de ABANCA e os logros organizativos, tecnolóxicos e de negocio alcanzados durante o ano pasado a pesar da complexidade da contorna económica. A continuación, Jesús Suárez e José Luis Barca debullaron os resultados obtidos por Bankoa ABANCA durante 2022, o primeiro exercicio completo na nova etapa do banco tras a integración en ABANCA. Neste apartado, recoñeceuse o bo desempeño das oficinas e equipos con mellores resultados nas distintas liñas de negocio.

Unha vez concluído o balance do último exercicio, o encontro centrouse na presentación e análise das prioridades comerciais e metas definidas para este ano co obxectivo de seguir avanzando na estratexia de crecemento e potenciación do proxecto e posicionar a Bankoa ABANCA como un actor relevante na zona norte peninsular.