‘Lugrís, paredes soñadas’ despídese da Coruña con grande éxito tras superar os 42.000 visitantes
- O mural restaurado ‘Vista da Coruña 1669’ continuará aberto ao público na entrada á oficina principal do banco na Coruña pola rúa Olmos
- Durante o mes de setembro mantéñense as visitas guiadas gratuítas ao mural os martes, mércores e xoves
Imaxe dunha das visitas guiadas realizadas á exposición ao longo destes meses.
A exposición ‘Lugrís, paredes soñadas’, organizada por ABANCA con motivo da restauración do mural ‘Vista da Coruña 1669’, pechou as súas portas este domingo na sede herculina de Afundación cun grande éxito de público. Desde a súa inauguración o 30 de marzo, esta ampla visión do traballo de Urbano Lugrís como decorador de espazos atraeu a un total de 42.301 persoas.
Entre estes visitantes destacan máis de 8.000 que participaron nalgunhas das propostas incluídas no amplo programa didáctico deseñado por ABANCA e Afundación para que todos os interesados puidesen profundar na vida e obra do artista galego, especialmente nas visitas comentadas de acceso libre e gratuíto e nos talleres para escolares.
A excelente acollida que brindou o público coruñés tanto a exposición como a restauración do mural confirma a proximidade da sociedade á figura de Lugrís e a preocupación xeneralizada que existía por garantir a conservación dunha das súas obras máis emblemáticas, a peza que realizou en 1952 para decorar a sede do Banco Hispano Suízo.
O proxecto acometido polo banco, que incluíu o seu traslado desde o local da rúa Real e a restauración da pintura, asegura o futuro da obra na súa nova localización, a entrada á oficina principal de ABANCA na Coruña pola rúa Olmos, 26, onde se exhibirá permanentemente a partir de agora no horario de apertura ao público destas instalacións: de luns a venres, de 8.15 a 14.15 horas e de 16.30 a 19.00 horas.
Ademais, debido á alta demanda detectada, durante o mes de setembro manteranse as visitas guiadas ao mural todos os martes e xoves (non festivos) ás 18.30 horas e os mércores (non festivos) ás 19.00 horas. Para gozar desta actividade, de acceso libre e gratuíto sen necesidade de reserva previa, só é necesario achegarse no horario establecido ao punto de encontro na rúa Olmos.