María Sánchez gaña a XLIV edición do Premio Internacional Afundación de Periodismo Julio Camba

16-01-2024

María Sánchez incorpórase desde hoxe á relación de xornalistas que, desde 1979, mereceron o Premio Internacional Afundación de Periodismo Julio Camba, un certame concibido para distinguir a calidade dos artigos literarios e de opinión publicados en cabeceiras recoñecidas en lingua castelá. O premio está dotado con 10.000 euros e unha figura do xornalista Julio Camba inspirada nunha caricatura de Siro López.

O galardón entregouse na Casa de América en Madrid no transcurso dunha gala retransmitida en directo a través de Afundación TV que contou con representantes dos principais colectivos de informadores da cidade e de España, anteriores premiados e premiadas, xornalistas e escritores de recoñecido prestixio españois e latinoamericanos, e persoas procedentes dos ámbitos da cultura e a universidade.

María Sánchez competiu como finalista con Armando Álvarez (Faro de Vigo) e José María Paz Gago (ABC). Presentara ao premio o artigo «Escoitar os mortos».

O xurado destacou o achegamento do texto á tradición popular, nun ton totalmente sinfónico co tema que aborda. Ademais, e segundo o veredicto, o artigo de María Sánchez é emotivo e literario, e está escrito desde unha perspectiva propia, aberta e respectuosa coa tradición.

Na XLIV edición do premio, o xurado estivo presidido polo escritor Alfredo Conde e o seu secretario foi o director de Comunicación de ABANCA, Isaac González Toribio. Actuaron como vogais os xornalistas e escritores Bibiana Candia, Manuel de Lorenzo e Cristina Sánchez-Andrade; o director da Fundación Gabo, con sede en Cartaxena de Indias (Colombia), Jaime Abello; e o escritor e exvicepresidente de Nicaragua, Sergio Ramírez.

A excelencia e a ética

O presidente de Afundación, a Obra Social de ABANCA, Miguel Ángel Escotet, abría a parte central do acto de entrega do premio cun discurso no que volveu sobre o obxectivo do galardón: «A procura da excelencia a través do recoñecemento de artigos de calidade, e impulsar e dar ás para transitar o apaixonante, e tan necesario, oficio de escribir». Escotet aludiu, durante a súa intervención, a conceptos relacionados coa calidade e a ética xornalística defendidos historicamente tanto por Sergio Ramírez, novo membro do xurado, como por Gabriel García Márquez, cuxa Fundación Gabo se vincula ao galardón. «É totalmente certo que este tempo é líquido, rápido, convulso, cheo de incertezas e desorde. Por iso sodes necesarios –subliñou Escotet–, porque escribir, como ler é, sobre todo, pararse a pensar, ordenar a reflexión, analizar as ideas. A escritura, o xornalismo, nacen no horizonte de quen observa a realidade, se reencontra cos seus pensamentos e memorias, descóbreos, analízaos e transcríbeos. É unha forma de conxelar o fluír do tempo e diluírse nunha paréntese a este mundo que reclama atencións a cada momento, para finalmente ofrecer, xenerosamente, un texto que estimule e provoque o xuízo crítico, o pensamento diferente».

Finalistas

María Sánchez incorpora o seu nome a unha relación de premiadas e premiados da que tamén son parte Luciano del Río Besada, Carlos García Bayón, Alfredo Conde, Bernardo Víctor Carande, Antonio Odriozola, Raimundo García Fernández, Adolfo Prego, José Montero Alonso, Rafael Landín Carrasco, Julio Sierra, Xesús Ferro Ruibal, Arturo Lezcano Fernández, Santiago Castelo, Torcuato Luca de Tena, Carlos Casares, Miguel Ángel Cuadrado, Juan Manuel de Prada Blanco, Diego Bernal López, Alfonso Eire López, César Casal González, Miguel Suárez Abel, Manuel Rivas Barros, Manuel Jabois Sueiro, Marino Gómez Santos, Eugenio Fuente, Fernando Savater, Felipe Benítez Reyes, Andrés Trapiello, Pedro Ugarte Tamayo, Ángela Vallvey Arévalo, Ramón Pernas López, José Manuel Otero Lastres, Ángeles Caso, Luis Ventoso, Ignacio Camacho, Ramón Loureiro Calvo, Miguel Anxo Murado, Ricardo Fernández Colmenero, Cristina Sánchez Andrade, Luis Pousa, Bibiana Candia e Manuel de Lorenzo Paradela, gañador da pasada edición.