Medio milleiro de profesionais de ABANCA percorren o último tramo do Camiño en apoio ao Xacobeo
- O grupo estivo encabezado polo presidente de ABANCA, Juan Carlos Escotet Rodríguez, e o conselleiro delegado, Francisco Botas
- O obxectivo da acción é visibilizar e dar difusión ao roteiro xacobeo e aos valores que representa
Foto de familia do grupo á súa chegada á Catedral de Santiago.
ABANCA concluíu este domingo 2 de outubro a acción colectiva de apoio á celebración do Ano Santo Xacobeo 2021-2022 que iniciou o 25 de xullo de 2021 co percorrido dos tramos iniciais de 13 roteiros diferentes do Camiño.
Máis de 450 persoas, entre empregados e empregadas do banco, e familiares que quixeron sumarse á iniciativa, partiron do Monte do Gozo e completaron os últimos quilómetros do histórico roteiro xacobeo ata chegar á Praza do Obradoiro. O grupo estivo encabezado polo presidente do banco, Juan Carlos Escotet Rodriguez, e o conselleiro delegado, Francisco Botas.
Con esta acción, na que participaron desde que se puxo en marcha ao redor dun milleiro de persoas de todas as direccións territoriais do banco en España, ABANCA quere contribuír a dar visibilidade ao Camiño de Santiago, punto de encontro entre culturas desde hai séculos e eixo vertebrador de Europa e España de norte a sur e de leste a oeste, así como a difundir os valores que representa, como a convivencia pacífica, a hospitalidade, a solidariedade, o esforzo ou o afán de superación.