Nace ABANCA, un banco para Galicia
ABANCA é un nome en galego, para un banco con alma de caixa que nace co obxectivo de merecer servir aos galegos
“Hoxe é o gran día. Hoxe nace ABANCA, un banco para Galicia, o banco dos galegos, o banco galego no mundo”. Con estas palabras o vicepresidente desta entidade, Juan Carlos Escotet, anunciaba oficialmente a nova marca comercial da primeira entidade financeira galega nun emotivo acto celebrado en Santiago.
O evento celebrouse no auditorio que ABANCA ten na capital de Galicia, e nel interviñeron tamén o presidente da Xunta, Alberto Núñez Feijóo; o presidente de ABANCA, Javier Etcheverría, e o seu conselleiro delegado, Francisco Botas. Asistiron como invitados representantes de todos os sectores da sociedade galega, “un síntoma da relevancia desta institución para esta comunidade e da expectación xerada por esta nova etapa”, segundo o presidente del banco.
Despois dunha intensa semana que comezou o sábado cunha convención que reuniu na A Coruña a todos os empregados e empregadas da entidade e continuou coa celebración, o luns, da xunta xeral de accionistas, a data de hoxe estaba marcada como o primeiro día na historia da nova entidade, “un día de orgullo, de satisfacción, de emoción e de esperanza”, en palabras de Francisco Botas.
ABANCA é “un nome en galego, para un banco con alma de caixa que nace co obxectivo de merecer servir aos galegos”, en palabras de Juan Carlos Escotet. Nace despois dun exhaustivo proceso de investigación sobre a percepción da entidade na sociedade galega e no propio cadro de persoal do banco. Co azul e o branco como cores predominantes, a nova marca do banco galego irá acompañada dun lema, Sentir Común, “que aglutina todos os valores do novo banco que nace con esta marca: a responsabilidade, a confianza, a calidade, a sinxeleza, a innovación”, explicou. A actividade da primeira entidade financeira para implantar a súa nova identidade corporativa nestas horas é frenética. Entre esta noite e mañá cambiarase a marca na totalidade da rede de oficinas e caixeiros e en todos os puntos nos que estaba visible a anterior imaxe, como recintos deportivos ou culturais. O sábado 28 de xuño comezará unha intensa campaña de publicidade da nova marca, con presenza en web, redes sociais, prensa, radio, televisión e soportes exteriores.
Nova estratexia
A nova identidade corporativa de ABANCA compleméntase cun cambio de estratexia na actividade del banco. A nova entidade centrarase na banca minorista tradicional pero multicanle, máis orientada ao cliente e co foco no servizo a pemes e familias. A concesión de crédito –cun prudente control do risco- terá un papel estratéxico na nova etapa, na que se impulsará tamén o negocio internacional como vía para apoiar as empresas nos seus procesos de internacionalización. ABANCA é, a día de hoxe, unha das entidades financeiras españolas con mellores ratios de solvencia e liquidez. O banco pretende seguir reforzando durante os próximos anos o seu capital e liquidez, para garantir un crecemento sostible. ABANCA posúe un claro liderado en Galicia. É a primeira entidade en número de oficinas, duplicando ao seu seguinte competidor; xestiona preto do 40% dos aforros das familias e empresas galegas e é tamén o seu primeiro financiador. O novo banco reforzará o seu posicionamento trala integración con Banco Etcheverría, prevista para o cuarto trimestre deste ano. Unha vez culminada a fusión, ABANCA contará cunha rede de 694 oficinas en España (583 en Galicia) e outras 15 no estranxeiro. O cadro de persoal estará conformado por arredor de 4.700 profesionais.
Presenza en medios sociais
En liña coa súa estratexia de achegar o banco á sociedade e ofrecer o mellor servizo aos seus clientes, ABANCA conta con perfís oficiais nas principais redes sociais: https://twitter.com/SomosABANCA, https://www.facebook.com/SomosAbanca, YoutubeSerás redirixido a outro sitio web, https://plus.google.com/111772667796262511436/posts e flickr.com/photos/somosabanca (nesta plataforma están dispoñibles desde hoxe mesmo os elementos da nova imaxe corporativa).