NCG Banco duplica a súa estrutura comercial en Galicia para impulsar o crédito e o servizo

  • Gabriel González Eiroa, novo director de Banca Minorista de Novagalicia

NCG Banco duplicou de tres a seis o número de direccións territoriais en Galicia e creou outras dúas para xestionar o seu negocio fóra da Comunidade Autónoma. A medida orienta a entidade cara a un modelo de banca de proximidade que impulse o crédito ás familias e pemes e potencie o servizo aos clientes.

Baixo a supervisión de Gabriel González Eiroa, director de Banca Minorista, o equipo territorial está composto por seis directivos galegos: Jorge Martínez Martínez (Vigo). Gerardo Fuertes Ayerdi (A Coruña - Ferrol), Walter Álvarez Álvarez (Lugo), Rubén Saavedra Pedreira (Ourense), Carmen Fernández Penas (Pontevedra) e Juan Carlos Carneiro Caneda (Santiago).

A nova estrutura comercial complétase coa Dirección Territorial de León e Asturias, con Marcos Lamas Seoane como director, e coa Dirección Territorial do Resto de España, baixo a tutela de Julián Mateos-Aparicio Prieto.

Segundo o director xeneral corporativo de NCG Banco, Francisco Botas, “o novo proxecto empeza polo máis importante: o equipo, o negocio e os clientes, porque é aí onde debemos estar, ao carón dos aforradores e das empresas, e canto máis preto, mellor”.

DIRECTORES

GABRIEL GONZÁLEZ EIROA. Licenciado en Ciencias Económicas pola Universidade da Coruña. Incorpórase á entidade en 1995. Ata hoxe era o director comercial de Novagalicia banco.

GERARDO FUERTES AYERDI. Licenciado en Ciencias Económicas na Universidade da Coruña. Incorporouse a NCG Banco no ano 1995. En novembro de 2010 asumiu o posto de director territorial de Ourense. Ata hoxe desempeñaba o cargo de Director Territorial A Coruña.

WALTER ÁLVAREZ ÁLVAREZ. Licenciado en Ciencias Económicas e Empresariais pola Universidade de Santiago. Incorporouse en 1992 á entidade. Foi director territorial de Lugo, Asturias e León. Até hoxe era director territorial de Pontevedra.

RUBÉN SAAVEDRA PEDREIRA. Realizou os seus estudos en Ciencias Empresariais na Universidade de Vigo. Iniciou a súa carreira profesional no banco en 1999. Desde decembro de 2001 e até hoxe fora director de zona de Ourense Centro.

CARMEN FERNÁNDEZ PENAS. Licenciada en Ciencias Empresariais pola Universidade de Santiago. Incorporouse á entidade en 1999. Desde 2010 era a directora de zona do Porriño-Condado Paradanta.

JUAN CARLOS CARNEIRO CANEDA. Licenciado en Ciencias Empresariais na Universidade de Santiago. En 1992 incorporouse á entidade. En 2011 foi nomeado director Territorial de Ourense. Era ata hoxe director territorial en Lugo-Ourense.

JORGE MARTÍNEZ MARTÍNEZ. Licenciado en Económicas e Empresariais pola Universidade de Santiago. Traballou en Banco de Galicia, Caja España e Banco CEISS. Desde setembro era o director de rede de expansión en Banco Etcheverría.

MARCOS LAMAS SEOANE. Licenciado en Dereito pola Universidade de Santiago. En 2004 incorporouse ao Banco Etcheverría. Foi o responsable da integración das oficinas de Novagalicia Banco en León na rede da entidade con sede en Betanzos.

JULIÁN MATEOS-APARICIO PRIETO. Licenciado en Económicas e Empresariais pola Complutense de Madrid. Incorporouse á entidade en 2003. Desde o 2013 era director de división de UGAS NGB.