O vicepresidente e o conselleiro delegado de ABANCA reúnense con institucións e empresarios canarios
- Juan Carlos Escotet Rodríguez e Francisco Botas Ratera mantiveron un encontro co presidente do Goberno de Canarias, Fernando Clavijo
- A entidade financeira, con catro oficinas en Canarias, prevé mellorar e reforzar o seu negocio nas illas
Francisco Botas Ratera e Juan Carlos Escotet Rodríguez durante a súa visita ao goberno canario
O vicepresidente de ABANCA, Juan Carlos Escotet Rodríguez, e o conselleiro delegado da entidade, Francisco Botas Ratera, mantiveron hoxe unha reunión co presidente do Goberno de Canarias, Fernando Clavijo, e a conselleira de Facenda, Rosa Dávila, na que lles expuxeron os principais eixos estratéxicos do banco e a súa aposta e compromiso co tecido produtivo canario.
Os dous máximos executivos da entidade atópanse de visita nas Illas Canarias onde manterán entre hoxe e mañá varios encontros de traballo con empresarios canarios en Santa Cruz de Tenerife e nas Palmas. O xoves reuniranse nas Palmas co conselleiro de Economía do goberno canario, Pedro Ortega, e realizarán unha visita ao Porto das Palmas.
ABANCA en Canarias
Con catro oficinas en Canarias, dúas na illa de Gran Canaria e dúas na de Tenerife, ABANCA ofrece un servizo integral con produtos especialmente adaptados a empresas e particulares. A entidade financeira conta en Canarias con preto de 8.000 clientes e xestiona un volume de negocio próximo aos 340 millóns de euros.
A entidade financeira prevé seguir mellorando durante os próximos anos o seu posicionamento en Canarias a través do crecemento do negocio con particulares e empresas, con especial foco na concesión de crédito. Proba deste compromiso é a recente firma dun convenio de colaboración coa Asociación de Empresarios de ‘O Sebadal’ (AEDAL) para dar un impulso ao crédito no polo industrial e tecnolóxico palmense.