Os Global Shapers e ABANCA lanzan unha caravana para coñecer que queren facer coa súa vida os mozos
- O grupo de mozos e mozas percorrerá 30 cidades españolas este mes para analizar a situación real do colectivo e fomentar o emprendemento
- O obxectivo dos organizadores é coñecer e difundir as inquedanzas da súa xeración a través dunha enquisa e un documental
De esquerda a dereita: Sara Sánchez, Natalia Pedrajas, Carlo Cifuentes e Sara Fernández, catro dos mozos que viaxarán na caravana ¿Qué quieres hacer con tu vida?
Descarga en alta resolución Serás redirixido a outro sitio web e abrirase nunha nova ventá
Unha caravana de mozos e mozas do movemento social Global Shapers percorrerá ao longo deste mes de xuño 30 cidades españolas para coñecer a situación e as inquedanzas deste colectivo e promover o emprendemento. A acción, que arrinca este venres día 5 en Vigo e percorrerá Galicia ata o día 12, forma parte do proxecto ‘¿Qué quieres hacer con tu vida?’ e conta co respaldo de ABANCA como continuación da súa iniciativa ‘Palabras para Galicia’.
O banco fixouse como obxectivo para este 2015 promover o debate sobre a importancia da educación e o emprendemento no futuro da xuventude e a construción dunha sociedade máis igualitaria. ‘Palabras para Galicia 2015’ contou coa participación do Premio Nobel da Paz 2014, Kailash Satyarthi, quen ofreceu na Coruña o pasado mes de maio a conferencia ‘Educación para unha sociedade sostible: construíndo alianzas innovadoras’.
Os mozos e mozas da caravana ‘¿Qué quieres hacer con tu vida?’ desenvolverán as súas primeiras actividades en Vigo os días 5, 6 e 7 de xuño. A partir de aí percorrerán toda España para preguntarlle a outros mozos, de entre 20 e 30 anos, cales son os seus soños para o futuro e cales son os obstáculos aos que se enfrontan para desenvolver os seus proxectos persoais e profesionais nas súas respectivas localidades.
A ruta deste proxecto, que percorrerá ata o 2 de xullo máis de 5.000 quilómetros, fará especial fincapé nas cidades galegas de Vigo (5, 6 e 7 de xuño), Pontevedra (8 de xuño), Santiago (9 de xuño), A Coruña (10 de xuño), Lugo (11 de xuño) e Ourense (12 de xuño). Tamén visitará Ponferrada, León, Oviedo, Gijón, Santander, San Sebastián, Pamplona, Zaragoza, Barcelona, Valencia, Albacete, Ciudad Real, Córdoba, Sevilla, Cáceres, Salamanca, Valladolid e Madrid. Co apoio de ABANCA impulsarase unha profunda análise para coñecer a situación real da mocidade, as súas inquedanzas, cales son os seus problemas para atopar traballo e por que moitos optan por irse fóra a buscar o seu futuro.
Na caravana viaxará tamén unha shaper de ABANCA para coñecer de primeira man a realidade dos mozos e mozas españois e como o banco pode axudarlles a facer realidade os seus soños. Poderemos seguir a experiencia desta representante de ABANCA e da caravana a través do blog emprendiendounviaje.com e dos seus perfís de Twitter (@sa_ontheroad) e Instagram (https://instagram.com/sa.f.m/).
A iniciativa inclúe unha investigación empírica de carácter nacional baseada en 60 entrevistas en profundidade que se realizarán de forma aleatoria e que teñen como obxectivo descubrir cales son as inquietudes e dificultades da mocidade á hora de desenvolverse no ámbito laboral.
A través da web do proxecto (http://quequiereshacercontuvida.com), todos os mozos e mozas que o desexen poderán aportar os seus testemuños persoais. Durante a viaxe, os membros da caravana gravarán un documental que permitirá poñer cara e voz ao testemuño destes mozos e mozas para despois compartilo con outros e animalos á acción.
‘¿Qué quieres hacer con tu vida?’ é un proxecto dos Global Shapers, un grupo de mozos nacido baixo o impulso do Foro Económico Mundial para dinamizar proxectos sociais, xunto a “Quiero salvar el mundo haciendo marketing” e Two Much. Está coorganizado polos Global Shapers, ABANCA e a Fundación Universidad Empresa (FUE), co apoio de Fundación Coca-Cola, Everis e Thinking Heads.