Primeira reunión de directivos de Etcheverría Banesco cos sindicatos de NCG Banco

Os principais directivos de Banco Etcheverría/Grupo Banesco reuníronse esta mañá cos representantes sindicais de NCG Banco, na primeira toma de contacto tras a privatización da entidade galega. Durante a reunión, os novos xestores reiteraron o compromiso asumido por Banco Etcheverría/Grupo Banesco de manter a xestión, a sede, e a obra social en Galicia, e o emprego.
Ao encontro asistiron o presidente de Banesco, Juan Carlos Escotet; o presidente de Banco Etcheverría, Javier Etcheverría, e o conselleiro delegado do banco con sede en Betanzos, Francisco Botas, así como os representantes do seis sindicatos presentes en NCG Banco, CC OO, CSICA, UGT, CIG, ASCA-CIC e CGT. A reunión prodúcese inmediatamente despois de que os directivos de Banco Etcheverría/Grupo Banesco tivesen os seus primeiros encontros cos responsables da rede comercial de Novagalicia e das principais áreas de decisión de NCG Banco.

Banco Etcheverría/Grupo Banesco expuxo á representación sindical de NCG Banco o seu compromiso de poñer en marcha unha política laboral que garanta, a través da rendibilidade e a eficiencia, o principal obxectivo do banco galego nesta nova etapa: impulsar o desenvolvemento socioeconómico de Galicia mediante a concesión de crédito. A entidade aborda un plan de novo financiamento a familias e pemes galegas por un importe superior aos 9.000 millóns de euros.