Standard and Poor’s eleva de estable a positiva a perspectiva de ABANCA

A axencia de cualificación Standard and Poor’s mellorou a valoración de ABANCA, elevando a perspectiva do rating de estable a positiva, como resultado da revisión anual da entidade. O rating emisor a longo prazo foi afirmado en BB+, a un chanzo do grao de investimento, e o de curto prazo en B.

A axencia tivo en conta para a súa decisión o aumento continuado da rendibilidade recorrente que a entidade veu conseguindo, así como as sólidas perspectivas de mellora a futuro nunha contorna de tipos de interese negativos.

Ademais, Standard and Poor’s destaca que a calidade dos activos de ABANCA sitúase por encima da do sector, e salienta a súa adecuada capitalización e equilibrado perfil de financiamento.

Durante 2018 e 2019, ABANCA recibiu 13 accións de carácter positivo de catro axencias que cualifican á entidade. Nese período de tempo, S&P mellorou a súa visión sobre o rating de entidade de ABANCA en 3 ocasións. Actualmente, o banco conta con grao de investimento das axencias Fitch e DBRS.