A IX edición da Romaría Internacional de ABANCA reúne a 400 invitados en Santo Estevo
- A representación institucional de ABANCA estivo encabezada polo presidente do banco, Juan Carlos Escotet Rodríguez, e o conselleiro delegado, Francisco Botas
- O encontro contou coa presenza do presidente da Xunta de Galicia, Alfonso Rueda, o alcalde de Nogueira de Ramuín, Julio Temes, e o secretario xeral de Emigración, Antonio Rodríguez Miranda
De esquerda a dereita, o conselleiro de ABANCA, Pedro López; o alcalde de Nogueira de Ramuín, Julio Temes; o conselleiro delegado de ABANCA, Francisco Botas; o presidente da Xunta de Galicia, Alfonso Rueda; o presidente de ABANCA, Juan Carlos Escotet Rodríguez; e o secretario xeral de Emigración, Antonio Rodríguez Miranda.
Descarga en alta resolución Serás redirixido a outro sitio web e abrirase nunha nova ventá
O presidente de ABANCA, Juan Carlos Escotet Rodríguez.
Descarga en alta resolución Serás redirixido a outro sitio web e abrirase nunha nova ventá
ABANCA celebrou hoxe no Parador de Santo Estevo (Nogueira de Ramuín, Ourense) a novena edición da súa Romaría Internacional, evento anual co que a entidade reforza os seus vínculos cos clientes non residentes de distintos países de Europa e América. A cita congregou a preto de 400 invitados procedentes de Brasil, Venezuela, Arxentina, Panamá, México, Estados Unidos, Reino Unido, Francia, Suíza e Alemaña.
A representación institucional de ABANCA estivo encabezada polo presidente do banco, Juan Carlos Escotet Rodríguez, o conselleiro delegado, Francisco Botas, o conselleiro Pedro López, o director xeral de Negocio Internacional, Alfonso Caruana, e o director xeneral Comercial, Gabriel González. O presidente da Xunta de Galicia, Alfonso Rueda, o alcalde de Nogueira de Ramuín, Julio Temes, e o secretario xeral de Emigración, Antonio Rodríguez Miranda, asistiron tamén ao evento.
Tras subliñar os valores naturais, históricos, culturais e económicos do lugar elixido para a celebración da xornada, un antigo mosteiro na Ribeira Sacra, Juan Carlos Escotet Rodríguez destacou a traxectoria dos empresarios e emprendedores galegos da emigración. “Do mesmo xeito que o mosteiro soubo adaptarse e reinventarse para seguir sendo un motor de desenvolvemento, vós demostrastes visión, capacidade de traballo e espírito innovador para construír grandes empresas, levando o enxeño galego máis aló das nosas fronteiras e creando riqueza e oportunidades en novas terras”, transmitiu aos invitados.
Referíndose a continuación á actual situación de incerteza xeopolítica e económica, o presidente de ABANCA manifestou a súa “firme convicción en que superaremos os retos que se nos presentan. Como emigrantes ou descendentes de emigrantes sabemos como afrontar o descoñecido. Esa resiliencia é a nosa mellor aliada en momentos coma este”, sinalou.
Tras a celebración do 10º Aniversario de ABANCA en 2024, nesta ocasión o evento estivo enmarcado no lanzamento do Plan Estratéxico da entidade para o período 2025-2027. O presidente de ABANCA detallou os seus tres grandes eixos, “o crecemento diversificado, a transformación e a proximidade ao cliente, profundando nos nosos valores de coidar ás persoas e a contorna”, e expresou a vontade da entidade para “avanzar en todas as frontes, cun foco especial na nosa expansión internacional”.