A reapertura dos colexios incrementa a actividade comercial en Galicia, segundo o Observatorio ABANCA by IESIDE

08-10-2020

O Observatorio ABANCA by IESIDE publica hoxe a sexta entrega do seu informe sobre a evolución da actividade comercial en Galicia, que nesta ocasión recolle datos do 31 de agosto ao 4 de outubro. Nesta nova entrega o documento ofrece por primeira vez información sobre o gasto dos turistas estranxeiros en Galicia, que se reduciu á metade na pasada campaña estival. Como outras conclusións, o Observatorio recolle un repunte da actividade como consecuencia do inicio do curso escolar e reafirma á tarxeta como medio de pago máis usado polos consumidores.

A análise dos pagos nos terminais punto de venda de ABANCA en Galicia mostra un descenso do 54% no gasto dos turistas estranxeiros durante o período estival. Esta caída fai que o peso do gasto internacional sobre o total descenda 6 puntos, desde o nivel do 16% de hai un ano até o 10% actual. Lugo e A Coruña son as provincias que sofren un maior impacto.

Efecto ‘volta ao cole’

A reapertura dos centros educativos trouxo consigo un incremento da actividade comercial, que en Galicia quedou situada 8 puntos porcentuais por encima da etapa pre-covid. En termos interanuais, o gasto dos clientes galegos de ABANCA na comunidade é agora 2 puntos superior ao mesmo período do ano 2019. No entanto, se se considera tamén o gasto efectuado polos consumidores galegos en comercios localizados fóra de Galicia, a actividade é un 3% inferior á do pasado ano neste momento.

O informe reafirma as novas preferencias dos consumidores no uso de instrumentos de pago. A tarxeta é o medio máis usado, co 46% dos pagos totais e un crecemento do 10% respecto ao ano pasado. Pola contra, o efectivo caeu un 11% desde o ano pasado, aínda que o seu uso estabilizouse respecto de agosto, e supón agora o 38% dos pagos totais.

Análise sectorial

A actividade comercial do sector alimentación aínda se mantén no período analizado moi por encima dos seus niveis de referencia. En relación coa situación pre-covid, a súa actividade é 26 puntos máis elevada, mentres que comparando co mesmo período do ano pasado o crecemento é aínda maior, do 31%.

O mesmo ocorre co sector farmacia, cuxo nivel de gasto é un 24% superior aos niveis previos á crise e un 37% maior que no mesmo período de 2019.

O comercio minorista sitúase en niveis superiores á etapa previa á crise, aínda que un 3% por baixo de hai un ano, e con gran disparidade entre os diferentes ramos.

O gasto en fogar e bricolaxe, que supón o 25% das vendas do comercio minorista, segue sendo o segmento de maior crecemento, situándose un 23% por encima dos niveis pre-covid e un 18% en comparación con hai un ano.

Pola contra, pezas de vestir e complementos sofren un descenso do 20% respecto dos niveis previos á crise e do 21% en comparación co mesmo período de 2019. Como consecuencia, a moda perdeu o liderado no comercio, pasando de supor o 30% das vendas totais a só o 23% neste momento.

Impulsadas pola volta ás aulas, as compras en multimedia e editorial (electrónica, libros, informática, música, etc.) atópanse un 55% por encima dos niveis previos á crise, aínda que un 2% por baixo do mesmo período do ano 2019.

Menor oscilación obsérvase no gasto en estética e benestar, con 6 puntos menos que na etapa pre-covid (7 en comparación con 2019), e nas compras vinculadas ao deporte, neste caso 4 puntos máis que antes da crise (pero 12 menos que hai un ano).

Á espera da recuperación

O gasto en lecer e en transporte segue sen recuperar os niveis anteriores á crise. O importe dedicado a lecer por parte dos galegos redúcese nun 29%, cunha caída especialmente intensa desde a terceira semana de agosto, momento no que en Galicia aplicáronse restricións ao lecer nocturno, entre outras medidas.

Este tipo de actividades mostran unha clara desaceleración como consecuencia do fin do período estival. Por encima de restaurantes, hoteis, discotecas e espectáculos, as axencias de viaxes son os establecementos máis negativamente afectados polo covid, cun descenso da súa actividade do 89% fronte ao mesmo período de 2019.

A actividade en transporte (incluíndo gasolineiras) mostra a mesma tónica: está situada un 28% por baixo dos niveis pre-covid e un 29% respecto ao mesmo período do ano 2019, manténdose estancado o gasto desde a primeira semana de xullo.

Estas conclusións, así como o resto das ofrecidas polo informe, aplícanse de maneira homoxénea e sen diferenzas significativas ás catro provincias galegas. As catro provincias sitúanse por encima do nivel pre-covid, mantendo unha evolución paralela, aínda que Lugo experimenta un maior repunte nas últimas semanas e A Coruña é a que mostra un menor crecemento respecto ao mesmo período do ano anterior.