A Xunta Xeral de Accionistas de ABANCA aproba a xestión e as contas de 2023
- Aprobadas por ampla maioría as oito propostas de acordos recollidas na orde do día
Imaxe da Xunta Xeral de Accionistas de ABANCA celebrada hoxe.
A Xunta Xeral de Accionistas de ABANCA, presidida por Juan Carlos Escotet Rodríguez, aprobou esta mañá, na súa reunión anual ordinaria, as contas anuais de 2023 e a xestión da entidade no ámbito da responsabilidade corporativa durante o pasado exercicio. No encontro, no que estivo representado o 90,092% do capital social da entidade, aprobáronse por unha ampla maioría as oito propostas de acordos recollidas na orde do día.
A Xunta celebrouse presencialmente e contou coa posibilidade de participar por vía telemática para asegurar a participación dos accionistas.
Os accionistas apoiaron co seu voto as contas anuais individuais e consolidadas do exercicio 2023. ABANCA obtivo en 2023 un beneficio atribuído de 711,3 millóns de euros, cunha rendibilidade ROTE do 16,0% e un desempeño que lle permitiu superar os seus obxectivos estratéxicos en rendibilidade recorrente, nivel de capitalización, volume de negocio e calidade do risco.
A entidade segue posicionada entre as primeiras do sector bancario español por calidade de activos, cun cociente Texas do 27,5%, unha taxa de morosidade do 2,4% e unha cobertura de activos dubidosos do 73,9%. A solidez do seu perfil financeiro complétase cun cociente de capital total do 16,9%, cun exceso de 1.499 millóns de euros sobre requisitos regulatorios, e un cociente LTD minorista do 84,9%.
ABANCA reforzou en 2023 o apoio financeiro á súa contorna, xogando un papel relevante no crecemento económico. O crédito a familias e empresas incrementouse un 14,0% en España e un 15,3% en Portugal, sumando case 9.700 millóns de financiamento concedido.
En 2023 ABANCA mantivo a súa aposta pola accesibilidade aos servizos financeiros, sendo a única entidade financeira en 175 concellos, e contribuíu con máis de 400 millóns de euros ás arcas públicas a través de diferentes impostos.
Outros acordos
A Xunta Xeral de Accionistas de ABANCA aprobou a reelección como conselleiros polo prazo de 3 anos de Juan Carlos Escotet Rodríguez, Francisco Botas, Pedro López Jácome, Manuel López Figueroa e Eduardo Eraña, actualizou a política de remuneración do Consello e rebaixou a duración do mandato dos conselleiros de 4 a 3 anos seguindo as guías do bo goberno corporativo.
O Consello de Administración de ABANCA está formado por 12 membros, 9 deles independentes, o que supón un 75% do total.