ABANCA, Afundación e AGA-Ucraína envían 23 toneladas de axuda humanitaria a Ucraína

11-03-2022

ABANCA, Afundación e AGA-Ucraína realizaron esta mañá o envío de 23 toneladas de axuda humanitaria a Ucraína. Un grupo de 30 voluntarios reunidos polas tres organizacións sumaron esforzos para cargar todo o material no camión, que partiu sobre as 11.00 horas da nave de Pocomaco cedida polo banco e a súa Obra Social a AGA- Ucraína como centro de operacións.

Espérase que a axuda chegue a Przemysl, punto fronteirizo entre Ucraína e Polonia onde está habilitado un almacén de recollida, o vindeiro martes, 15 de marzo. Desde alí, realizarase o traslado do material ata o seu destino final, as municipalidades de Truskavets e Leópolis. Estas dúas localidades están situadas ao oeste de Ucraína, aproximadamente a cen quilómetros da fronteira polaca, e atópanse polo momento apartadas das zonas de centrais da ofensiva, pero sofren desabastecemento de produtos básicos e están a recibir a moita poboación desprazada doutras zonas do país que foxe cara á fronteira e que necesita asistencia humanitaria.

O material enviado esta mañá procede das doazóns recibidas pola asociación desde diferentes puntos de Galicia e das recollidas organizadas a pasada fin de semana polo Real Club CeltaSerás redirixido a outro sitio web e o Real Club DeportivoSerás redirixido a outro sitio web en colaboración co banco e a súa obra social. Inclúe roupa de abrigo (mantas, sacos de durmir, roupa térmica, etc.), alimentos precociñados e en conserva, produtos de alimentación infantil, material de primeiros auxilios e medicamentos, e produtos de hixiene, tanto básicos como de hixiene feminina e infantil.

A presidenta de AGA-Ucraína, Natalia Afonina, sinalou que “estamos en contacto permanente coas autoridades e axentes locais que coordinan a asistencia á poboación e será necesario seguir enviando axuda nas próximas semanas, aínda que poden variar as necesidades”. Tamén fixo fincapé en que “seguen sendo fundamentais as doazóns económicas”.

O presidente de Afundación e director xeral de Responsabilidade Social, Sostibilidade e Comunicación de ABANCA, Miguel Ángel Escotet, agradeceu “todo o traballo que está a realizar AGA- Ucraína e a solidariedade demostrada por toda a sociedade galega, que se implicou coas accións de recollida de material que se organizaron”. Así mesmo, subliñou que tanto o banco como a súa Obra Social “continuamos ao dispor dos colectivos sociais para colaborar nas iniciativas que poidan xurdir para facer fronte á tremenda crise humanitaria provocada polo conflito”.

Ademais do apoio á asociación AGA- Ucraína, ABANCA e Afundación manteñen vixentes outras medidas que impulsaron para contribuír a paliar as necesidades da poboación ucraína e as persoas refuxiadas, como a conta solidaria ES80 2080 7208 3385 3000 7122 para recadar fondos para Cruz Vermella e Save the Children, a gratuidade das transferencias que se realicen desde España a Ucraína ou o aproveitamento da infraestrutura creada para o programa Cultura por Alimentos para a recollida de material nos espazos de Afundación.