ABANCA apoia o diálogo sectorial financeiro sobre progreso, sostibilidade e dixitalización celebrado en Santiago

14-09-2023

O presidente de ABANCA, Juan Carlos Escotet Rodríguez, e o conselleiro delegado, Francisco Botas, participaron hoxe no evento ‘Diálogos co sector bancario para o progreso económico e social’, organizado por AEB, CECA e UNACC, en colaboración coa Presidencia española do Consello da Unión Europea.

A xornada, que tivo lugar no Centro ABANCA Obra Social de Santiago de Compostela, contou tamén coas intervencións da vicepresidenta primeira e ministra de Asuntos Económicos e Transformación Dixital en funcións, Nadia Calviño, o presidente da Xunta de Galicia, Alfonso Rueda, o presidente do Banco Central de Uruguai, Diego Labat, o ministro de Facenda e Crédito Público de Colombia, Ricardo Bonilla, a presidenta de AEB, Alejandra Kindelán, o director xeral de CECA, José María Méndez, e a secretaria xeral de UNACC, Cristina Freijanes, ademais dunha ampla representación de organismos e entidades financeiras españolas.

Solidez do sector financeiro

Na súa intervención de apertura, o presidente de ABANCA destacou que “o sector financeiro ten un papel decisivo para asegurar o crédito, apoiar o investimento, facilitar o consumo, impulsar infraestruturas e facilitar servizos financeiros”. Como logros dos últimos anos, mencionou o esforzo realizado en financiamento e outras fórmulas de apoio aos clientes, así como as súas melloras en solvencia, liquidez e morosidade.

De fronte ao futuro, destacou a importancia da sostibilidade e a transformación dixital. Sobre a primeira defendeu que sexa "compatible cun proceso que minimice os efectos negativos e capture as oportunidades que suporá para novos sectores", aínda que doutra banda expresou a súa preocupación por que "este titánico reto da humanidade descanse demasiado no papel da banca”.

En relación coa dixitalización, sinalou que “continuará cambiando o carácter, as operacións, a relación cos clientes e o desempeño da banca no seu conxunto”. Sinalou que as entidades deben "cumprir as esixentes expectativas dun cliente dixital” ao mesmo tempo que proporcionar “unha atención próxima e persoal ao cliente máis analóxico". Ademais reclamou "evitar que a fenda dixital desencadee exclusión financeira, con especial impacto na atención aos maiores".

Sostibilidade

O conselleiro delegado de ABANCA, Francisco Botas, interveu na sesión dedicada á sostibilidade. En primeiro lugar explicou que a responsabilidade é un dos valores corporativos de ABANCA desde o seu lanzamento. Isto traduciuse, entre outras decisións, en ser un dos Signatarios Fundadores dos Principios de Banca Responsable, a iniciativa financeira do Programa das Nacións Unidas para o Medio Ambiente (UNEP FI).

Como temas de especial relevancia para o proceso de transición, citou a necesidade de que, como ocorre en ABANCA, a sostibilidade estea liderada nas organizacións polo consello de administración e a alta dirección. Doutra banda, no plano da regulación, avogou por unha maior homoxeneización dos conceptos e clasificacións, mellorando as definicións e concretando os obxectivos.

Como elementos que definen o modelo de ABANCA no ámbito da sostibilidade, destacou a súa vocación de acompañamento ás empresas. Así, explicou que, sen reducir o financiamento brown, o banco está a potenciar o financiamento verde e sendo especialmente activo en actividades como a automoción e a vivenda. Ademais de na regulación, sinalou que a entidade centra o seu esforzo no cliente, con exemplos como a creación de ABANCA Energy para trasladar o seu coñecemento ás empresas.

Outras actividades

Ademais de intervir no evento ‘Diálogos co sector bancario para o progreso económico e social’, o presidente de ABANCA, Juan Carlos Escotet Rodríguez, e o conselleiro delegado, Francisco Botas, participan no desenvolvemento de Financial Forum 2023 Eurofi, enmarcado tamén no ECOFIN Informal que se celebra en Santiago de Compostela esta semana.