ABANCA comeza a financiar con aval do Estado a empresas e autónomos afectados pola emerxencia
- A entidade realizou as primeiras operacións cos seus clientes hoxe venres, só tres días despois do anuncio do plan de avais do Goberno
- A entidade traballa na liña de poder resolver a maioría das solicitudes nun prazo de 24 horas
Descarga en alta resolución Serás redirixido a outro sitio web e abrirase nunha nova ventá
ABANCA formalizou hoxe venres as primeiras operacións de financiamento con aval de Estado dirixidas a facer fronte ás consecuencias do COVID-19 sobre a actividade de empresas e autónomos.
Tras o anuncio do plan de avais realizado o martes polo Goberno, ABANCA adaptou os seus procesos internos para dotar da máxima axilidade á tramitación destas operacións. A entidade traballa na liña de poder resolver a maioría delas nun prazo de 24 horas e sen necesidade de intervención notarial naquelas cuxo importe non supere os 100.000 euros.
O banco está a priorizar as solicitudes que se viñeron recibindo nas últimas dúas semanas de pemes, empresas, negocios e autónomos, colectivos aos que se dirixe o plan de axuda. No entanto, o banco mantén estreitos contactos co conxunto da súa base de clientes nestes segmentos para coñecer e xestionar anticipadamente as necesidades dos sectores máis afectados polo COVID-19.
As operacións formalizadas son préstamos de até cinco anos de prazo, con posibilidade de carencia de amortización e intereses, e con garantía do ICO fixada en función do importe da operación e o tamaño da empresa.
Máis financiamento
Estas liñas de financiamento súmanse ao ‘Plan Anticipar’, mediante o cal ABANCA mobilizou 7.900 millóns de euros en liñas de liquidez para empresas, pemes, autónomos, negocios e comercios.
A través del, ABANCA pon a disposición de máis de 6.000 pemes e empresas clientes, de forma inmediata, máis de 1.700 millóns en crédito para atender continxencias de tesouraría e compromisos de pago (nóminas, provedores, etc.), así como 4.400 millóns créditos preconcedidos de maneira automática e con tramitación áxil.
O plan habilitou así mesmo 1.800 millóns de euros en crédito preconcedido a curto e longo prazo para autónomos, negocios e comercios, un segmento particularmente afectado pola situación actual.