ABANCA controla o 91,65% de AC Gestión, tras formalizar a compra da xestora

19-05-2015

ABANCA asinou o traspaso definitivo da actividade de AC Gestión, unha vez recibida a autorización da Comisión Nacional do Mercado de Valores (CNMV). A operación, que se acordou o pasado 19 de novembro, contempla a venda a ABANCA do 78,41% do capital social de AC Gestión, o que unido ao 13,24% que posuía a entidade financeira galega sitúa a súa participación no 91,65%.

A porcentaxe adquirida hoxe repártese da seguinte forma: un 51% de accións clase A de Ahorro Corporación S.A., un 10,09% de accións clase B de Ahorro Corporación S.A., e o 17,32% restante procedente dun grupo de accionistas minoritarios, todos eles entidades de crédito.

A compra materializouse polo valor dos recursos propios, 6 millóns de euros, aínda que o prezo axustarase en relación aos gastos que foron necesarios ata a perfección da operación.

“A compra da xestora enmárcase”, segundo o director xeral de Mercado de Capitais, Xestión e Distribución Institucional de ABANCA, Juan Luis Vargas-Zúñiga, “na aposta que ABANCA fai pola calidade na xestión do fóra de balance, tanto nos fondos como nos plans de pensións”.

ABANCA dotará a AC Gestión de novos sistemas informáticos, manterá o persoal da mesma e incorporará xestores en áreas específicas, como fondos de fondos, ou especialistas na xestión de seguros. A xestora terá total independencia para xestionar os recursos de terceiros, fundamentalmente clientes institucionais, e incorporar á súa carteira de produtos fondos de alto valor para os clientes vía xestores de alta especialización.

A peche do pasado abril, AC Gestión contaba cunha oferta de 61 fondos de investimento, cun patrimonio baixo xestión de 3.250 millóns de euros.