ABANCA e Afundación entregan máis de 500 equipos de extinción de incendios aos municipios de Ourense

16-06-2026

ABANCA e a súa Obra Social, Afundación, deron hoxe un novo paso no seu compromiso co rural galego mediante a entrega de 511 equipos de extinción de incendios forestais aos municipios da provincia de Ourense. A colaboración e o apoio loxístico da Deputación de Ourense foron fundamentais para coordinar a distribución deste material ás administracións locais. Os lotes subministrados foron deseñados especificamente para optimizar os labores de extinción en contornas rurais e facilitar unha actuación áxil antes da chegada dos servizos de emerxencia. Cada kit está composto por unha mochila ríxida con lanza de dobre acción que expulsa auga de xeito continuo e un batelume para sufocar as chamas sobre o terreo.

O acto de entrega e distribución do material tivo lugar no Parque de Maquinaria da Deputación e a el asistiron o presidente da institución provincial, Luis Menor, o director territorial de ABANCA en Ourense, José María Jardón, o coordinador de Responsabilidade Social Corporativa e Sostibilidade de Afundación, José Manuel Mourelo, e o director de Banca Agro de ABANCA, Jesús Combarro, alén dun nutrido grupo de alcaldes e alcaldesas da provincia que acudiron a recoller os equipos. O número de kits por municipio determinouse en función da súa extensión, garantindo así unha cobertura proporcional ás necesidades de cada termo municipal.

O director territorial de ABANCA en Ourense, José María Jardón, destacou que "o compromiso de ABANCA co rural ourensán é absoluto. Quen traballamos pegados ao territorio sabemos que o monte é vida e economía para os nosos municipios, e con esta achega queremos que a primeira liña de defensa, que son os concellos, conte desde hoxe mesmo con ferramentas que permitan reaccionar con rapidez antes da chegada dos servizos de extinción".

Pola súa banda, o coordinador de RSC e Sostibilidade de Afundación, José Manuel Mourelo, subliñou que "esta entrega demostra como a cooperación institucional multiplica o impacto da acción social. Desde Afundación canalizamos o esforzo deste plan no ámbito da prevención dotando aos municipios de materiais homologados e de alta calidade, reforzando a seguridade das persoas e do noso patrimonio natural".

O presidente da Deputación de Ourense, Luis Menor, agradeceu esta entrega afirmando que demostra “a responsabilidade e implicación absoluta destas entidades co noso territorio” e apelou á colaboración de todos porque os incendios son “unha ameaza colectiva que esixe que aglutinemos esforzos desde todos os ámbitos da sociedade”.

Despregamento con foco en Ourense

Esta entrega constitúe a partida principal dun lote global de 1053 kits adquiridos pola entidade financeira e a súa Obra Social. O resto dos equipos distribuiranse proximamente noutras zonas especialmente afectadas e identificadas como vulnerables de Lugo, León, Estremadura e Asturias co obxectivo de maximizar os seus recursos e capacidade de reacción ás portas da campaña de verán.

Plan integral contra os incendios

Esta adquisición de material forma parte do Plan de Acción contra os incendios que activou o banco en agosto de 2025 e que se está executando a través de Afundación. Este programa global estrutúrase ao redor de tres grandes eixos: o apoio económico aos afectados, a restauración medioambiental dos terreos danados e, de xeito prioritario, a prevención e a concienciación social.

Este plan de acción conta cunha dotación específica dun millón de euros. Alén destes kits de extinción, o pasado decembro presentáronse os equipos de vixilancia de última xeración proporcionados á Xunta de Galicia, que operarán en comarcas de alto risco como Valdeorras, Verín e a Ribeira Sacra.