ABANCA lanza unha plataforma de doazóns para impulsar a captación de fondos para ONGs
- O proxecto, liderado pola unidade de Banca Privada Entidades Non Lucrativas e Impacto, arrinca en colaboración con oito das principais organizacións sociais de España
- Cris contra el Cáncer, Fundación Aladina, Fundación Vicente Ferrer, Educo, Acción contra el Hambre, Cáritas, Médicos del Mundo e Plan Internacional son as primeiras en sumarse á iniciativa
Descarga en alta resolución Serás redirixido a outro sitio web e abrirase nunha nova ventá
ABANCA dá un paso estratéxico no seu compromiso co sector fundacional e asociativo co lanzamento dunha plataforma de fundraising. Trátase dunha solución tecnolóxica deseñada para impulsar a captación de fondos, simplificar a canalización de donativos e resolver a complexa xestión administrativa e fiscal que afrontan as entidades non lucrativas.
O novo sistema permite ás ONGs receptoras levar un control exhaustivo e automatizado das achegas. Ademais, integra o envorcado de datos privados das persoas que realizan as doazóns en formatos estandarizados, o que facilita ás organizacións a emisión dos certificados fiscais das achegas recibidas de forma automática.
O Team Leader de Entidades Non Lucrativas e Impacto de ABANCA, Armando Fandos, sinala que “os nosos clientes colaboran economicamente de forma habitual cun amplo número de organizacións e o obxectivo deste novo proxecto é ofrecerlles máis facilidades para canalizar o seu compromiso e máis seguridade no proceso”.
O coordinador de RSC e Sostibilidade de Afundación, Jose Manuel Mourelo, subliña que esta solución “tamén responde á vontade do banco por colaborar co terceiro sector, facilitando a estas entidades sociais ferramentas profesionais e impulsando as doazóns que lles permiten levar a cabo a súa actividade”.
Despregamento gradual
O proxecto ponse en marcha coa colaboración das principais ONGs de ámbito nacional, entre as que figuran entidades de referencia como Cris contra el Cáncer, Fundación Aladina, Fundación Vicente Ferrer, Educo, Acción contra el Hambre, Cáritas, Médicos del Mundo e Plan Internacional.
Nun primeiro momento, a operativa estará dispoñible a través da rede de oficinas de ABANCA. Nos próximos meses, a funcionalidade incorporarase tamén aos caixeiros automáticos e o resto de canles dixitais do banco.
A iniciativa contou desde o primeiro momento co respaldo de Afundación, a Obra Social de ABANCA, que tamén utilizará a plataforma para os seus propios proxectos e iniciativas, reforzando a sinerxía entre a actividade bancaria e o impacto social da organización.
Aposta pola especialización
Este lanzamento consolida a aposta que ABANCA iniciou en outubro de 2024 coa creación da súa unidade especializada en Banca Privada Entidades Non Lucrativas e Impacto. Esta división proporciona servizos de xestión de patrimonio a institucións relixiosas, fundacións e asociacións, un colectivo que demanda unha prudencia extrema e unha aliñación total cos seus fins fundacionais.
Coa nova plataforma de doazóns, ABANCA non só reforza a súa capacidade de captar novos clientes institucionais no mercado nacional, senón que se posiciona como un colaborador transversal que ofrece desde asesoramento inmobiliario e fiscal ata formación especializada para o terceiro sector.