ABANCA e o Centro de Empresas A Curtidora de Avilés renovan o seu acordo de apoio a emprendedores
- ABANCA impartiu tamén un taller de confirming e factoring a todas as empresas da Curtidora
O director de Banca Institucional de ABANCA, Santiago Novoa, e a alcaldesa de Avilés, Mariví Monteserín, durante a sinatura do convenio.
ABANCA e o Centro de Empresas A Curtidora do concello de Avilés renovaron hoxe o acordo de colaboración en materia financeira que mantiñan desde hai un ano. Grazas a este texto, as dúas entidades aúnan esforzos para axudar economicamente, a través do financiamento e o asesoramento personalizado, aos emprendedores e empresarios da Curtidora.
No acto, celebrado esta mañá en Avilés, participaron o director de Banca Institucional de ABANCA, Santiago Novoa, e a alcaldesa de Avilés, Mariví Monteserín. Coa firma deste acordo vólvese a poñer a disposición dos integrantes desta asociación un amplo catálogo de produtos con condicións melloradas e que serve como mostra do compromiso co tecido empresarial asturiano.
O ano pasado, grazas a este acordo de colaboración, máis de 20 asociados da Curtidora tiveron acceso a financiamento de ABANCA en condicións vantaxosas. Ademais, profesionais da entidade financeira galega impartiron un taller de confirming e factoring para as empresas asociadas.
O convenio de financiamento facilita a emprendedores e empresas da Curtidora o acceso a unha ampla oferta financeira con condicións melloradas respecto ao mercado. Entre os produtos máis atractivos que poden contratar estes clientes figuran préstamos persoais para emprendedores, pólizas de crédito, avais, desconto comercial, entre outros. Tamén accederán a tarifas especiais nos seus cobros con Terminais Punto de Venda (TPV), así como a asesoramento especializado en materia de seguros e banca electrónica. Os asociados do Centro de Empresas A Curtidora tamén poderán eliminar as comisións máis habituais na contratación de produtos e servizos, grazas ao Programa Cero Comisións.
O Centro de Empresas A Curtidora é un instrumento do concello de Avilés para os emprendedores e empresas que desexen instalarse na cidade con locais para oficinas ou talleres en réxime de aluguer temporal e en condicións vantaxosas.
ABANCA, pola súa banda, é a entidade financeira de referencia no noroeste español, cunha rede de case 700 oficinas e unha clara orientación cara ao tecido empresarial.