ABANCA estrea na Coruña unha nova oficina para o acompañamento dixital a clientes
- O banco transforma a súa oficina de Obelisco nun innovador espazo aberto e funcional pensado para axilizar a operativa habitual de particulares e negocios con axuda das canles dixitais e de autoservizo
- O centro abre en xornada de mañá e tarde e ofrece ao cliente apoio personalizado para operar desde a banca móbil e o caixeiro
Nova oficina de ABANCA na zona de Obelisco, na Coruña.
Descarga en alta resolución Serás redirixido a outro sitio web e abrirase nunha nova ventá
Vista interior da nova oficina de ABANCA na zona de Obelisco, na Coruña.
Descarga en alta resolución Serás redirixido a outro sitio web e abrirase nunha nova ventá
ABANCA estrea hoxe na Coruña un novo concepto de oficina que sitúa a dixitalización e a autonomía do cliente como eixos centrais da experiencia de servizo. O banco renovou por completo a súa céntrica oficina na zona do Obelisco para implementar este innovador enfoque, baseado no acompañamento personalizado ao cliente no uso das canles dixitais e de autoservizo para axilizar as súas xestións máis frecuentes.
A nova oficina ABANCA é un gran espazo aberto e luminoso, sen barreiras e cun deseño moderno e funcional, que potencia a proximidade, a transparencia e o confort. Está pensada, principalmente, para proporcionar a particulares, negocios e pemes da principal zona comercial e de servizos da Coruña apoio á hora de operar desde a banca móbil e o caixeiro automático para realizar operacións como o pago de recibos, transferencias, ingresos, reintegros ou a alta de tarxetas de transporte, entre outras.
Para ofrecer aos clientes maior flexibilidade e comodidade, a oficina de Obelisco dispón de horario comercial estendido. Abre ao público en xornada de mañá e tarde (de luns a xoves, de 8.15 a 14.00 horas e de 16.30 a 18.15 horas).
O centro conta con equipamento tecnolóxico de vangarda que facilita a interacción co cliente e fomenta a dixitalización e a omnicanalidade. Ten unha ampla zona de autoservizo 24 horas, dotada con catro caixeiros multifuncionais, desde os que é posible realizar as operacións cotiás en calquera momento e con total accesibilidade grazas a funcionalidades como o menú simplificado ou guiado por voz. Ademais, a oficina dispón de dispositivos de benvida, wifi gratuíta e tabletas que facilitan a mobilidade dos empregados para atender o cliente en calquera espazo da oficina.
Zona de acompañamento dixital
Un dos elementos diferenciadores deste novo concepto de servizo que evoluciona o modelo de oficina de ABANCA é a zona de acompañamento dixital, pensada para axudar aos clientes a familiarizarse coas novas solucións tecnolóxicas que facilitan as xestións bancarias. Desde este punto situado á entrad, profesionais da oficina reciben aos clientes e, en función das súas necesidades de servizo, asístenos no uso das ferramentas de banca a distancia e autoservizo, facilitando a súa autonomía na realización de operacións dixitais.
En liña cos valores de ABANCA, a oficina destaca tamén pola súa sostibilidade medioambiental. Na renovación do espazo coidáronse aos máximo aspectos como a eficiencia enerxética, o control de consumos ou o aproveitamento da luz solar a través de grandes ventás. Ademais, grazas á dixitalización de procesos redúcese ao mínimo o consumo de papel na oficina, con pautas como o fomento da firma dixital de contratos mediante o servizo Firma ABANCA ou os dispositivos portátiles, ou a consulta de xustificantes e documentos desde a banca móbil do cliente.