ABANCA impulsa o seu negocio de seguros con novos produtos, estrutura e modelo comercial
- A entidade agrupa en tres sociedades a súa actividade de seguros tras recuperar a totalidade da cadea de valor
- ABANCA Vida y Pensiones, compañía con maior taxa de crecemento no primeiro trimestre en España
- A Tarifa Plana, o produto estrela de ABANCA no mercado asegurador, é recomendada por 9 de cada 10 clientes
De esquerda a dereita, Francisco Botas, conselleiro delegado de ABANCA, e Álvaro García Diéguez, director xeral de ABANCA Seguros.
Descarga los contenidos anexos
ABANCA vén de relanzar a súa actividade no negocio de seguros e plans a través dun plan de acción que inclúe a creación dunha nova estrutura organizativa, a implantación dun novo modelo comercial e a presentación de novos produtos, como a Tarifa Plana, caracterizados pola súa innovación, sinxeleza e valor para o cliente.
“No actual escenario de tipos e crecente dixitalización, esta liña de negocio ten para ABANCA unha importancia clave, á altura do financiamento a empresas, a actividade dixital, os medios de pago e a vinculación co cliente”, sinalou o conselleiro delegado de ABANCA, Francisco Botas no acto de presentación que a entidade organizou hoxe en Santiago.
O negocio de seguros constitúe un dos principais instrumentos da política de diversificación de ingresos de ABANCA. O banco facturou en 2015 170 millóns en primas de seguros e xestiona 2.138 millóns en pensións e seguros de aforro. Respecto a 2014, o segmento de vida creceu un 31,5%, o de non vida un 38,6% e a captación neta de plans de pensións un 109%. O número total de clientes situouse en 384.000. No primeiro trimestre de 2016 ABANCA Vida y Pensiones situouse como a compañía de maior crecemento no mercado español, situándose no posto 7 do ranking, cinco lugares máis arriba que en decembro de 2015.
Proceso de reordenación
Nos últimos anos ABANCA desenvolveu un proceso de reordenación societaria a través de compras e fusións que lle permitiu recuperar o 100% do control sobre a cadea de valor do seu negocio de seguros. Este proceso incluíu como principais operacións as compras das participacións do 50% nas sociedades conxuntas que ABANCA mantiña con Aviva e Caser, así como a fusión das corredurías de ABANCA e o Banco Etcheverría. Tras este proceso, ABANCA pasou de operar a través de cinco sociedades a facelo unicamente a través de tres coas que cubre todo o espectro de clientes e produtos.
ABANCA Seguros Vida y Pensiones opera no ramo de vida e pensións, ABANCA Seguros Operador de Bancaseguros en mediación de produtos de comercialización xeralista, e ABANCA Seguros Correduría no segmento de grandes riscos. Esta estrutura, apoiada por 2.500 xestores comerciais na rede de oficinas de ABANCA, conta cun equipo propio de 190 profesionais dotados dun alto grado de especialización nos diferentes segmentos. O segmento de previsión social, especializado en plans de pensións e aforro, dispón de 140 persoas. O segmento de empresas tamén conta con tratamento específico para atender as súas características diferenciais.
O cliente, centro da estratexia de ABANCA
Os seguros e plans de pensións constitúen un segmento de gran impacto económico para o cliente, que ten neles unha ferramenta para protexerse de eventualidades e xerar aforro de cara ao futuro. En 2015 os clientes de ABANCA recibiron 40 millóns de euros en prestacións de seguros e 129 millóns en prestacións de aforro/pensións. As prestacións de fogar, pagos protexidos, vida e autos beneficiaron a 53.409 clientes.
Nos ramos de vida risco e vida aforro ABANCA pon á súa disposición produtos de creación propia adaptados ás necesidades persoais de cada cliente. No ramo de non vida ABANCA selecciona a mellor oferta económica e de coberturas entre un amplo catálogo de compañías provedoras. Posteriormente, unha vez que o produto foi comercializado, ABANCA realiza un proceso de métricas e control de servizo para garantir a satisfacción do cliente.
Tarifa Plana, produto estrela
ABANCA lanzou nos últimos meses numerosos produtos para cubrir diferentes necesidades en diferentes segmentos: Seguro de Vida Muller, Seguro de Vida Maiores de 45 Años, Seguro de Salud Autónomos, etc. Ademais iniciou a comercialización dun novo catálogo de plans de pensións e de rendas vitalicias. Todos eles foron deseñados baixo as mesmas premisas que o banco aplica na creación de todos os seus produtos e servizos financeiros: sinxeleza, innovación e valor para o cliente.
A Tarifa Plana de ABANCA Seguros, un paquete bonificado que permite aos clientes agrupar nun único recibo mensual todos os seus seguros e aforrar ata un 7% do importe total sen intereses nin comisións, é o produto con maior protagonismo entre eles. A enquisa de satisfacción realizada por ABANCA Seguros reflicte que 9 de cada 10 clientes que contrataron o produto recoméndano. O 92% considera que cubre as súas necesidades reais, o 86% sitúao como primeira opción se contratase máis seguros, o 89% destaca que ofrece un beneficio mutuo para o banco e o cliente, o 98% valora moi positivamente o labor dos xestores de ABANCA, e o 70% outórgalle unha nota de 9-10 tras a contratación.