ABANCA impulsará as tres próximas edicións do FID Castilla y León
- O banco e a organización subscriben un acordo a longo prazo que reforza o evento e garante a súa continuidade
- O FID levará o nome do banco nas edicións de 2022, 2023 e 2024
De esquerda a dereita, Francisco del Río e Marcos Lamas na presentación do novo acordo.
ABANCA e a Asociación Golden Dreams Team subscribiron un acordo de colaboración a longo prazo que reforza o compromiso que mantén o banco co Foro Internacional do Deporte de Castilla y León (FID Castilla y León) desde os seus inicios en 2017.
En virtude do convenio, o evento levará o nome do banco nas próximas tres edicións, que se celebrarán en 2022, 2023 e 2024.
O director territorial do banco en Castilla y León, Asturias e Cantabria, Marcos Lamas, e o presidente da Asociación Golden Dreams Team e director do FID Castilla y León ABANCA, Francisco del Río, foron os encargados de rubricar o documento que materializa o apoio do banco a esta iniciativa que xa se consolidou na axenda deportiva nacional.
Durante a presentación do acordo, que ten vocación de continuidade, Marcos Lamas sinalou que a colaboración de ABANCA enmárcase dentro do seu compromiso con León e coa promoción do deporte, unha das liñas estratéxicas do banco no ámbito da responsabilidade social. Ademais, o director territorial subliñou que “ABANCA non se limitará ao simple patrocinio, senón que, como fixo ata o de agora, implicarase na organización do evento e promoverá actividades paralelas cos deportistas que participen para que toda a cidade poida envorcarse co foro e gozalo”.
Francisco del Río manifestou a súa satisfacción pola subscrición deste acordo a longo prazo “que é consecuencia e recompensa á nosa traxectoria durante estes cinco anos e que ABANCA puxo en valor”. Engadiu o director do FID que “este vínculo dános seguridade e permitiranos mellorar a planificación anual para seguir crecendo como evento de referencia deportivo a nivel nacional”.
O FID Castilla y León ABANCA reúne cada ano en León a algúns dos mellores deportistas e adestradores da historia do deporte para que expoñan as súas experiencias persoais e profesionais co obxecto de que sexan fonte de inspiración e referencia para a sociedade, ademais de crear un espazo onde se fomente o deporte e a práctica deportiva na cidadanía, en particular na mocidade. A sexta edición do evento desenvolverase os días 15, 16 e 17 de setembro no Auditorio de León e o programa darase a coñecer proximamente.