ABANCA lanza un novo servizo de asesoramento en filantropía para clientes de banca privada

05-11-2026

ABANCA dá un novo paso na evolución do seu modelo de negocio co lanzamento dun novo servizo de asesoramento en filantropía. Esta solución está especificamente deseñada para acompañar a particulares, familias e empresas do segmento de banca privada na definición, estruturación e desenvolvemento dos seus proxectos de impacto social e medioambiental.

Con este movemento, a entidade sitúase á vangarda do sector bancario en España, adoptando unha práctica altamente consolidada nas principais firmas de banca privada internacional. O obxectivo do banco é ofrecer unha cobertura integral que transcenda a xestión financeira tradicional para poñer o foco no propósito, o compromiso social e a continuidade do legado patrimonial dos seus clientes.

O team leader de Banca Privada Entidades Non Lucrativas e Impacto de ABANCA, Armando Fandos, destaca que “queremos axudar aos nosos clientes a entender que, máis aló da doazón, a filantropía é unha ferramenta coa que é posible contribuír a proxectos a longo prazo que resulten verdadeiramente transformadores e xeren impacto. Grazas á estreita colaboración coa nosa Obra Social, Afundación, e ao noso profundo coñecemento do ecosistema de entidades non lucrativas, ofrecemos un acompañamento experto durante todo o proceso”.

Tres eixos estratéxicos

Para garantir unha xestión rigorosa e personalizada, o novo servizo de asesoramento en filantropía está estruturado en tres fases. En primeiro lugar, a entidade traballa co cliente na definición da súa visión, identificando as motivacións privados, delimitando o problema social ou ambiental que se busca abordar e involucrando á familia no proxecto. A continuación, procédese ao deseño da estratexia mediante a análise dos vehículos xurídicos e fiscais máis adecuados e a creación de alianzas estratéxicas. Para rematar, incorpórase a reflexión sobre o impacto xerado para entender de forma precisa os resultados obtidos, algo fundamental para poder mellorar e detectar novas oportunidades de colaboración no futuro.

O Proxecto PLANCTON de Afundación, punto de partida

Como parte do despregamento inicial do servizo, ABANCA poñerá ao dispor dos seus clientes de banca privada unha primeira causa medioambiental amplamente consolidada: o Proxecto PLANCTON, impulsado por Afundación e enfocado na conservación, protección e restauración dos ecosistemas mariños e fluviais. Esta iniciativa púxose en marcha en 2021 e desde entón as accións impulsadas neste marco permitiron retirar máis de 164 toneladas de residuos das contornas costeiras.

Os clientes que o desexen poderán colaborar tanto mediante achegas económicas como a través da participación activa nas xornadas de sensibilización e limpeza do litoral que se organicen. PLANCTON será a primeira dunha serie de causas filantrópicas nas que a entidade reforzará as sinerxías coa súa Obra Social e con outros aliados do sector non lucrativo, A posta en marcha deste novo servizo reforza a aposta pola especialización que iniciou o banco coa creación da súa unidade especializada en Entidades Non Lucrativas e Impacto, e consolida o seu posicionamento non só como socio financeiro dos seus clientes, senón como un actor clave no impulso do desenvolvemento sostible e social.