ABANCA lanza unha emisión de Tier 2 por 500 millóns de euros

ABANCA anunciou e executou hoxe a emisión de 500 millóns de euros de obrigacións subordinadas Tier 2 ao 8’375% que substituirá á emitida en xaneiro de 2019 e desembolsarase o 23 de xuño próximo. A nova emisión conta con ratings (esperados) de BB (Fitch) e Ba2 (Moody´s) e vencerá en setembro de 2033.

O mercado reaccionou positivamente recolléndose ordes que superaron en 2’7 veces o importe solicitado, o que demostra o interese que esperta o nome entre investidores. Con máis de 100 ordes individuais, o libro presenta moi boa granularidade, gran calidade en canto ao tipo de investidor e pon en valor o momento de execución nunha contorna de mercado condicionado polas incertezas macroeconómicas e xeopolíticas.

A emisión, que se dirixiu a clientes profesionais e contrapartes elixibles, inscríbese na estratexia de cumprimento de obxectivos de capitalización e cocientes MREL do banco, que mellora ao emitir 150 millóns de euros máis que a emisión que substitúe, optimizando así a estrutura de capital total. No contexto da xestión eficiente dos seus instrumentos MREL, ABANCA ofreceu aos seus investidores a posibilidade de adiantarse á substitución da emisión antiga (prevista para xaneiro de 2024) mediante recompra que se liquidará tamén o próximo día 23 de xuño.