ABANCA participa no Día Solidario das Empresas con actividades na Coruña, Vigo e Madrid

19-10-2018

ABANCA participará na duodécima edición do Día Solidario das Empresas que se celebra este sábado 20 de outubro con diferentes actividades benéficas organizadas na Coruña, Vigo e Madrid. En total, 30 voluntarios do banco súmanse a esta iniciativa promovida por Cooperación Internacional ONG e Atresmedia que se desenvolverá de maneira simultánea en 11 cidades españolas e que ten como obxectivo promover o voluntariado corporativo e sensibilizar desde o ámbito empresarial sobre os problemas reais da nosa contorna.

Na cidade herculina, os profesionais de ABANCA colaborarán na preparación das comidas que servirá ese día a Cociña Económica aos usuarios do seu comedor social.

Os voluntarios e voluntarias da comarca de Vigo desprazaranse ás instalacións da ONG Aldeas Infantís en Redondela para preparar cos nenos e nenas que residen alí unha comida saudable.

Por último, en Madrid, o persoal de ABANCA participará nunha xornada de Goalball organizada pola ONCE. A idea é que poidan coñecer este deporte específico para persoas con discapacidade visual que se xoga cunha pelota sonora e os ollos tapados, así como compartir unhas horas con deportistas que o practican.

Para concluír a xornada solidaria en cada unha das cidades os empregados e empregadas de ABANCA terán ocasión de intercambiar experiencias con voluntarios doutras empresas participantes e representantes das entidades benéficas colaboradoras durante unha comida de confraternización.

O Día Solidario das Empresas é un proxecto de Cooperación Internacional ONG e Atresmedia que ten o obxectivo de promover e facilitar a participación social das empresas a través do voluntariado corporativo. Este ano celébrase a undécima edición do evento e está previsto que participen nas diferentes actividades organizadas un milleiro de voluntarios de 50 empresas.